Diasabra mainta, dia 4 di augustus 2018, muchanan cu nan mayornan a participa na un caminata den Spaans Lagoen esaki en conexion cu e clausura di e programa vacacional di Biblioteca Nacional Aruba. E programa a hiba como tema “Nos Parhanan” cual a dura cuater siman y tabata pa muchanan entre 6 y 12 aña.
E prome siman tabata na encargo di Aruba Birdlife Conservation y unda e muchanan a haya e oportunidad di traha un obra di man, e di dos siman e muchanan a haya oportunidad di wak un película tocante imigracion di parhanan, cortesia di Parke Nacional Arikok, e di tres siman tabata na encargo di e artista visual Elvis Tromp, kende hunto cu e muchanan a dibuha un trupiaal y di cuater siman tabata e caminata den Spaans Lagoen y alabes e clausura unda e muchanan a haya oportunidad pa explora habitat di e parhanan bao di tremendo guia di e hoben parkranger di PNA, sr. StantonTromp.
Un danki di parti di Biblioteca Nacional Aruba na e colaboradonan di e programa, Parke Nacional Arikok, Aruba Birdlife Conservation, Elvis Tromp, sponsornan y tur cu di un manera of otro a contribui na exito di e programa.
