Jeff Charles tin un decepcion grandi. E no por kere cu e tin 9 luna sperando pa cita cu specialista y ora cu el a kere cu e ta bay hay’e mas lihe, door cu el a warda asina hopi, el a bin tende cu tin luga p’e te na luna di maart.
E ciudadano a conta di e caminda di cruz cu el a cana for di aña pasa mei pa cu su salud. E ta haya cu mester pone mas atencion den Cuido Medico pa e pashentnan cu no tin haber cu COVID. E ta sinti un negligencia den e area aki pa motibo cu tur cos ta mucho concentra riba e pandemia.
Bay publico cu asuntonan priva di dje, manera su salud, ta algo cu e no tabata kier a haci, pero e situacion cu e ta pasando aden a oblig’e tuma e paso aki.
Door di problema cu curason e tin mas cu 10 aña den man di dokter. Aña pasa,hustamente den luna di maart, el a cuminsa sinti malo cu keintura pa cual nan a kere cu ta COVID. Pero esaki no tabata e caso y tampoco a keda demostra cu e tin infeccion. Solamente colesterol y keintura halto. Ademas di esaki, e tabatin hopi dolor di curpa.
Na mei e mester a bay busca cita cu specialista y a haya cita te 13 di juli. Den e transcurso ey su dokter di cas a keda den contacto cu ne. Ora e dia tabata yegando, a yam’e pa informa cu ta cancela su cita pa un otro dia den e luna ey mes. Sinembargo un siman a pasa y no a tende nada. A bolbe contactnan, y el a bin tende cu den algun dia ora cu pone fecha p’e lo yam’e. “Wel, te dia di awe nan no a yamami.”
Den tur e tempo ey el a sigui haya guia di su dokter di cas, pero e mester di atencion di un specialista pa mira con avansa su malesa (sickle cell) ta.
E ta compronde cu ta laga pashentnan warda, pero no por laga un persona spera pa 9 luna largo. Hustamente awe el a haya un afspraak nobo pa final di maart awo. Pero no a keda contento cu e trato cu a haya na e oficina di specialista.
E falta di atencion tambe ta un crisis. E ta sugeri pa bini cu un team di tres persona cu ta controla e specialistanan. Si nan tin demasiado hende, pasa nan pa otro specialista. Mester analisa cual di nan ta urgente. “E no ta dushi pa biba cu dolor. Unda mi por haya un trato cu yudami. Cada dia cu e specialista aki keda sin atendemi, mi salud ta bay atras. Mi tambe tin famia, mi mester di ayudo. Ami ni ningun hende riba e isla aki merece e trato aki.”
E ta apela na e mandatario pa sigui su conseho pa instala un comision. “Tin hopi hende eyfo cu ta malo, cu ta busca pa mehora salud y no ta haya atencion. COVID ta mata pero otro malesanan tambe ta mata. Ta hopi tristo pa biba den un pais cu luho cu otro caminda no tin, pero no ta haya e servicio cu merece, cu no por haya un specialista pa mira con avansa su malesa ta.”
