Eiriana Boekhoudt, mama di un baby a trece su malcontento cu un agencia di modelahe a traves di un declaracion riba video. BC Model Agency no kier reconoce y acepta cu su yiu di un aña no ta tuma parti den nan campaña of pagina di modelahe.
E asunto a sosode aña pasa caba na december, unda cu el a pidi pa kita potret di su yiu y a hacie. E aña aki atrobe a publica potret di su yiu y e mama a bisa ta basta. No a manda un mensahe priva, pero si a publica online y a pidi un biaha mas pa por fabor kita potret di e mucha.
Eiriana Boekhoudt a tuma nota cu ta hopi dificil y no kier bay di acuerdo cu ne. Nan ta para riba un punto cu e tata a duna autorisacion. E tata di e yiu ta forma parti di e agencia di modelahe. Ta compronde esey, segun e ciudadano. Pero e kier a aclaria cu e como mama, cu no ta duna autorisacion pa e yiu ta riba e pagina, tin cu acepta esaki y punto. No tin discusion.
A tuma nota cu compania a publica un relato riba nan pagina di Facebook unda ta bisa cu e ciudadana ta difamando e compania. Eiriana Boekhoudt a splica cu difamacion ta nifica algo cu no ta berdad of inventa algo pa daña nomber di un compania. El a indica cu aki su punto tabata pa respeta su decision como mayor, vooral como mama di e criatura di un aña di edad.
Mientras tanto den e relato ta acusa e mama di difamacion, ta bira haci algo hopi fout y delicado, cual ta publica tocante di su bida priva. Si otro partido, cual ta e modelo, a conta di loke ta pasando aden, ta su derecho. Pero esaki no ta duna e compania e derecho pa publica riba e pagina, cual ta uno publico cu hopi follower.
E ciudadano ta spera cu esaki por yega na e plataforma di e agencia di modelahe, mirando cu nan a blokie for di nan pagina di Facebook. E solucion no tabata pa blokie, sino mas bien pa simplemente delete un potret. Esaki tambe ta pa informa otro mayornan cu por pasa den un situacion similar, pa no acepta pa esaki pasa cu nan, ni cu e yiunan.
