Diabierna, riba Black Friday, e trafico riba nos Isla tabata uno hopi pisa cu diferente accidente rond. Pa mas o menos 4or di atardi ta pidi asistencia di polis pa un hoben cu a keda alcansa pa un auto crusando e avenida principal di Watty Vos na altura di Kooyman na Cumana.
Un hoben di apenas 11 aña coriendo riba su bicicleta lo a bay trata di crusa Watty Vos Blvd biniendo for di Dakota. E prome parti el a crusa cu exito pero lamentablemente e siguiente pida e no tabatin e mesun suerte. Un vehiculo cu no a percata e intencion di e hoben no por a para mas na tempo na momento cu el a crusa cu su bicicleta.
E vehiculo ta alcansa a criatura y ta fractura su pia door di e impacto.
Mientras cu testigonan a yega di biaha pa yuda e criatura tanten ambulance ta yega, ta sosode un otro accidente entre vehiculonan na e mesun sitio. Nada di gravedad ni mucho daño material pero ta pone un peso extra riba e trafico cu na e momento ey ya caba tabata totalmente pega. Polis a presenta di varios parti pa duna un man y cuminsa dirigi e trafico.
A opta pa manda e trafico baha e caminda secundario dilanti Kooyman pa asina subi te banda di rotonde Cumana dunando espacio na autoridadnan pa atende cu e accidentenan na sitio.
Black Friday bayendo basta scur pa algun automobilista y ta pidi pa tene cuenta cu e drukte, pa tin un poco di pasenshi extra pa tur hende yega sano y salvo nan cas.
