Na clausura di e Celebracion di Hubileo di 70 Aniversario di Parokia di Paradera ta un bon occasion pa bisa danki. P’esey Pastoor Canuto (Toti) Fuentebella di parokia di Paradera kier a gradici un y tur cu di un manera of otro a participa y a contribui na e celebracionnan di e hubileo di 70 aniversario durante e aña aki.
Primeramente nos kier yama Dios Todopoderoso danki; pa e oportunidad di gracia cu El a duna nos, tambe e conocemento, sabiduria y bon salud pa nos por a edifica su Iglesia un biaha mas y hib’e na tur otro durante e aña aki pa medio di nos celebracionnan di 70 aniversario di nos parokia.
Pastoor Toti kier gradici inmensamente; tur nos donantenan di sponsor cu a duna nos parti di nan biennan pa nos por a cubri gastonan di nos programanan, tur e colaboradonan cu di un of otro forma a colabora cu forsa laboral y medionan na realisacion di e programanan, e famianan di nos barionan di Paradera cu a habri porta di nan cas pa ricibi nos den e anochinan di oracion, tur nos artistanan pa nan bunita presentacion durante nos programanan cultural y na tur boluntario cu di un of otro forma a yuda y a contribui na bienestar di e celebracion aki.
Un danki particular ta bai; na tur nos cooperadonan y e miembronan di comisionnan cu a forma parti di e Comision Organisado Hubileo 70 Aniversario cu a duna hopi di nan tempo liber y conocemento na realisacion di e hubileo aki, tur e parokianonan di Paradera pa nan atencion, yudansa y participacion den e celebracionnan di e hubileo.
Berdaderamente e nombernan ta mucho hopi pa mensiona, pero di curason un danki na boso tur.Cu Dios bendiciona boso ricamente.Mara cu e hubileo aki por a yena nos curason cu e gracia y bendicion cu nos a ricibi durante e aña aki.
Finalmente Pastoor Toti ta desea e pueblo di Paradera y di Aruba henter un temporada di advent bendiciona.
