Diabierna den oranan di 3:30 di atardi un ciclista ta keda herida despues cu un auto ta alcans’e bou di e “overpass” di Watty Vos Blvd situa banda di EPB Hato.
Testigonan na sitio a conta cu e ciclista lo a tuma e ruta di Ponton y bin abou riba e via nobo di Watty Vos Blvd. Caminda cu na banda tin pasada pa peaton/ bicicleta por uza pa ehercita y/o transita.
Biniendo di direccion pariba, e ciclista lo tabata yegando na e brug cu intencion pa crusa riba e verkeersplataeu pensando cu e lo tin preferencia pa crusa aki riba. E vehiculo biniendo for di Paradijswijk pasando bou di e brug tampoco no a tuma nota cu e ciclista lo tabata acercando.
Impacto tabata inevitabel
E auto ( Hyundai Blue drive color blauw, blanco y berde) no por a evita y ta alcansa e ciclista. Door di e impacto e ciclista ta cay riba e hood di e auto dal den e windshield y ta bay cay riba hood di un otro auto ( Hyundai accent color preto) cu tabata biniendo for di direccion contrario, y termina riba caminda.
E ciclista a keda bastante herida, por a nota cu e tabata tin sanger ta basha for di nanishi y tabata keha masha hopi di dolor na nek. Ambulance a yega y a cuminsa trat’e mesora. Polisnan na sitio como tambe un nurse cu tambe tabata eynan a yuda caminda nan tabata por pa tene e victima un poco comodo den e solo cayente cu e tabata aden.
Varios unidad di polis a presenta pa duna asistencia cu e trafico cu a keda desvia mientras tabata atende cu e accidente. Mirando tambe cu e trafico ta sumamente pisa, ta consehabel pa chauffeurnan core un poco mas cu cautela pa asina evita accidentenan lamentabel.
