Cu tanto mala suerte e chauffeur aki a subi Bernhardstraat na altura d Kentucky Fried Chicken y bay dal frontal den un auto bayendo direccion pariba. A keda tres herido atras den e desgracia, cu a sosode rondi di 12:00 am, memey di e blackout. Varios ambulance a activa pa brinda asistencia na e sitio, tambe na e causante di e desgracia, cu tabata hopi altera y agresivo, cu consecuencia cu mester a boei e na man cu pia pa transport’e den ambulance.
E accidente tabata entre un auto marca Toyota modelo Tercel color berde, numera A-30538 cu a bay dal frontal den un auto marca Daihatsu modelo Serion color blauw, numera A-11427.
Den e Tercel tabatin un solo persona mientras cu den e Daihatsu tabatin nos colega Joshua Bryson y un pasahero mas. Ambos a ricibi tratamento medico na e sitio mes of a hiba ImSan pa cuido adicional.
E daño material ta considerabel. E chauffeur di e Tercel, cu a causa e accidente, no por a demostra un prueba di seguro na polis. Ta parce cu e auto no tin su papelnan na ordo, cu lo por hinca e victima di e accidente den problema. Polis lo sigui cu mas investigacion mientras cu tanto Nagico como Forensys a presenta pa tuma datonan di e accidente pa seguro.
