Dialuna no solamente a habri cu e Toque de Queda, pero tambe cu varios asistencia cu Polis a haya nan mes ta duna. Esaki tabata e caso tambe pa un accidente riba e caminda di Pavia cu ta bay pa Morgenster.
Den e area aki cerca ya caba oranan mas trempan tabatin dos accidente y esaki tabata algun shen meter mas leu.
Tabata trata aki di un accidente unda cu un auto a dal den un pal’i luz na banda drechi di caminda. Remarcabel ta cu ta varios biaha caba auto den exactamente e lorada ey ta dal den e mesun pal’i luz.
Na yegada di e patruya di Polis a topa cu un Honda Fit preto sin plaachi number riba dje pega na e mesun pal’i luz di semper. No tabata tin niun hende presente na e sitio di accidente.
A recorda cu algun rato prome a joyride un auto na Modanza cu exactamente e mesun descripcion, a lanta e sospecho cu aki lo trata di e mesun auto horta. Polis a busca den area rond pa wak si por a topa cu e chauffeur di e Honda accidenta, pero no a logra haya niun hende. Mientras un patruya a keda banda di e auto, otro a bay na e adres di Modanza pa tuma tur dato y pa confirma cu e auto accidenta en berdad ta e mesun vehiculo.
.
