Diasabra awo dia 27 di augustus, Koningin Wilhelmina Fonds Aruba ta organisa e charla ‘Ban Preveni Cancer Hunto’. Lo tin diferente orador cu lo bin na palabra. Entrada na e evento ta gratis, pa cual ta invita henter Aruba pa bin pone bo mes na altura di locual por haci pa evita cancer.
Angelique Salsbach, un nutricionista, lo elabora riba nuticion saludabel cu enfoke riba prevencion di cancer. Mirto Tromp, un mondhygienist, lo splica riba e importancia di bon cuido oral, no solamente pa prevencion di cancer pero tambe con pa cuida bo boca si bo mester bai haya tratamento pa cancer. Rosetna Martinus, un transformational & wellness coach, lo enfoca riba e importancia di movecion y un lifestyle saludabel.
Alabes e fundacionnan cu ta traha duro riba conscientisacion pa preveni of trata cancer tambe lo ta presente. Stichting BOB cu ta e fundacion cu ta percura pa controla pecho di hende muhenan regularmente tambe lo haci un presentacion. Mary Joan Foundation cu ta duna guia y ayudo na hende homber y hende muhe cu tin cancer na pecho lo ta presente pa splica mas di nan trabou. Mamma Poli ta e clinica na Horacio Oduber Hospital special pa personanan cu tin un of otro enfermedad di pecho, tambe lo ta presente pa splica riba nan trabou y amplia mas riba e proceso di tratamento medico di cancer di pecho na Hospital.
E mainta di charla lo tuma lugar na Piedra Plat Entertainment Center den Sala Vale Croes y lo ta for di 9.00 am pa 12.00 pm. Entrada ta gratis y tur hende ta bonbini pa conscientisa nan mes riba cancer y con biba un bida saludabel.
