E ta un situacion fastioso, ta despues di Parada di Luz na San Nicolas cu San Nicolas a lanta tur dorna na slinger plata. Ta un grupo so nan bisti tabata cu slinger plata, Champagne Carnival Group.
Pa nan mala suerte, e tipo di paña cu a scoge ta parce no a want’un bon biento, sodo y bailamento riba otro. Melony Croes-Paesch ta di Champagne Carnival Group (CCG), a acerc’e p’asina ricibi nan band’i medaya relaciona cu e situacion aki. Pa algun tabata un momento frustrante di mira San Nicolas cu yen di slinger rond.
Melony a comenta cu nan t’ey pa duna cara, e no tabata nan intencion. Tipo di paña cu nan a uza ta un trend mundialmente y a scoge pa uz’e den un parada asina bunita manera Parada di Luz. Na ningun momento tabata na altura cu e tipo di paña lo los asina y laga caya tur sushi, awo por conclui cu e no tabata un bon idea pero ta un les pa tur grupo y pa nan mes di CCG.
Nan ta para responsabel y ta complementa p’esey tambe. A crusa brug cu binticuater envelop yena cu placa y binticuater cah’i cerbes pa henter e crew di Serlimar cu a haci un tremendo trabou di haci e cayanan limpi.
“Bo no ta lanta mainta y bisa ban daña San Nicolas”, Croes a comenta, claro tabatin comentario negativo pero esaki ta bin cu ne ora bo ta e grupo di carnaval mas grandi na Aruba. CCG ta biba cu San Nicolas, e tin un luga special pa nan. Tur parada y tur evento pariba, Champagne t’ey.
Lienchie Merryweather ta lider di grupo, el a inicia bisando: “mi ta pidi mil disculpa”, a bin cu algo nobo y cu ta resalta pero cosnan por pasa. Nan ta para responsabel pero no ta laga afo cu e grupo a resalta durante e Parada di Luz.
Pa Lienchie personalmente, e ta gusta e paradanan di San Nicolas mas cu tur mirando cu ta sinti e pueblo ta biba cu bo.
