Despues di hopi esfuerso finalmente Kibrahacha a logra haya un bus completamente nobo. Esaki a bini despues di diferente evento pa recauda fondo cu a realisa den aña 2020.
A combersa cu Jeffrey Matos, director di Centro Kibrahacha a Piedra Plat, y e tabata hopi satisfecho di esfuersonan haci cu a conduci cu awe nan tin un bus completamente nobo. Esaki tabata necesario pasobra mester busca e clientenan rond Aruba pa acudi na eventonan diario cu tin na e centro situa na Piedra Plat.
Na momento cu e centro tin su propio bus, e ta yuda pa maneha nan gastonan di un miho forma y percura cu e grandinan tin e transporte pa diferente evento cu sa organisa. E fundacion ta existi pa 35 aña y ta unico cu tin servicio for di cas di e grandinan den tur bario pa e centro di actividad.
Aworaki tin evento solamente un biaha pa siman, debi na e situacion di COVID. Pero nan ta spera cu por amplia esaki asina cu e situacion mehora.
Aworaki e bus ta core riba ruta di San Nicolas tur dialuna y diahuebs, cu pronto lo amplia e ruta. Nan tin un bus grandi cu 33 asiento y dos bus chikito cu 13 y 15 asiento, suficiente pa busca nan na cas pa e centro.
Ultimo añanan a haci diferente analisis riba nan gastonan, buscando un forma mas eficiente di uzo di e recursonan. Pero tambe con pa sigui trece e clientenan na Kibrahacha. A sinti cu tin un necesidad grandi pa mas grandi bira miembro. Pero nan no tin forma pa yega te Piedra Plat. “Esaki ta un proyecto cu a culmina den compra di nos mesun bus grandi cu tin 33 asiento.”
Pa loke ta 2021 tin varios proyecto di cual un di nan ta ”Mi ta inclui”. Pa esaki ta en busca di boluntarionan cu lo bay pasa den diferente sesion di training y guia. Esaki ta un forma pa keda mantene e grandinan cu ta nan so na cas activo.
Nan ta sigui tur protocol y a pesar di hopi asiento, no ta uza tur e asientonan. Prome cu bus sali y na su regreso ta haci esaki limpi.
