Un situacion basta tenso cu persona seriamente herida despues cu un auto a ranca sali y alcansa un personal di Guarda nos Costa. Esaki tabata un accion intencional na momento cu tabata bezig cu control na edifico comercial na Shaba.
Esaki a tuma luga den careda di 10:30 am ora cu a pidi presencia di polis y ambulance cu maximo urgencia dilanti edificio comercial na Shaba ( caminda Island Finance ta ubica) pa un vehiculo cu dos ocupante aden cu a sali na careda na momento cu a tuma nota cu tin control di warda nos costa den e area.
E dicho vehiculo ( Un Nissan Cube color geel cu shinishi ) tabata na e sitio parti patras, pa servicio cerca un garage mecanico chikito cu ta ubica tras di e edificio. Na momento cu e prome trahado a acerca e vehiculo, ambos persona a core subi e auto cu unico intencion di sali bandona e area inmediatamente.
E momento ey, e prome trahado a haci e intento di kita e yabi for di e starter, pero ya caba e chauffeur a pone e vehiculo den reverse y a cuminsa ranca core. E trahado mester a bula hala atras pa asina scapa su mes.
E trahado femenino di Guarda nos Costa no tabatin e mes un suerte. Na parti dilanti di e edifcio tabatin e resto di grupo controlando e parti dilanti. Na e skina di e edificio, cu ta e salida, e personal femenino tabata para y a duna ordo/indicacion na e chauffeur pa e para pero esaki no a haci caso, no a sigui e ordo.
El a opta intencionalmente di sigui core y a pasa dal e trahado seriamente. Nan a sali na careda y bandona e sitio riba velocidad halto direccion noord. Sopresa y indigna e resto di colega a mira e sucedido aki tuma luga. Ambulance a presenta pa atende cu e personal cu a resulta seriamente herida cu sla na cabes. Mientrastanto a cuminsa un buskeda extenso den ful e area di Noord. Ta buscando dos homber latino den un Nissan Cube.
Autoridad a tuma e atentado aki hopi na serio como cu ta trata di un intento intencional di asesinato contra un trahado publico, cu ta castigabel. Lo ta pendiente un update riba e caso aki.
