Un di e pruebanan grandi cu Ministerio Publico a bin cu ne tabata nan testigo Luegenne “Gen” Roga cu lo tabatin tur cos pa condena Benny Sevinger pa soborno di un suma grandi di placa. Un testigo strea cu na final a bira un strea cu a cay of un testigo cu a mira spirito.
Ministerio Publico den su rekisitorio den caso Avestruz a bisa corte cu ta proba cu Sevinger a haya un suma grandi di placa for di Leoncita Arends, a cambio pa haya e opcion riba un tereno comercial pa Deshaun y Elenath di cual Arends tabata UBO (Ultimate Beneficiary Owner). Pa esaki el a trece un testigo, un prueba, cu ta esun di Gen Roga.
Por corda ainda e presentacion cu e.o. abogado mr. Doris Canwood, representante di Leoncita Arends, a haci den corte cu stapel di placa y stapel di ticket di lotto di Florida. Pa demostra cu loke cu Gen Roga ta papiando no ta cuadra y no tin sentido.
Manera ta conoci, Gen Roga a traha pa algun aña pa Leoncita Arends cu tabata consider’e su asistente personal. Den e dossier tin e diferente declaracion cu el a duna, pero esun na hues comisario tabata esun mas cla pa corte (hues).
El a bisa den su declaracion cu riba ordo di Leoncita a hiba un envelop grandi, cu placa, na cas di Benny Sevinger pa entrega esaki n’e casa di Benny. El a declara tambe tin di haber cu e ganashi di benta di e terenonan. E envelop cu el a hiba tabata grandi, bruin y diki. Pues te aki un declaracion contundente.
A haci investigacion y a lesa den e dossier cu en berdad dia 21 di januari 2016, tabatin contacto telefonico entre Gen Roga y e casa di Benny Sevinger. Roga a yama pa sa exactamente unda e cas di nan ta keda. E casa a bisa cu berdad Gen Roga a yam’e p’esey. Pero e motibo pakico ta diferente.
Segun defensa, Gen Roga a bay busca un envelop cu e ticketnan di lotto cu Claudia Sevinger a trece for di Merca pa Leoncita. Gen Roga mes a declara cu e no a habri e envelop mira kico tin eyden, pero cu e tabata convenci cu tabata trata di placa.
Hues a bisa cu corte no por simplemente ignora e defensa y ta kere cu mester evalua declaracion di e testigo Gen Roga cu debido cautela.
Na prome luga, corte a constata cu e declaracionnan di testigo Gen Roga na Landsrecherche y despues na hues comisario no ta consistente. Tin varios punto cu no ta cuadra cu e puntonan obhetivo mustra door di Landsrecherche.
E momento cu segun Gen Roga el a hiba placa pa Sevinger na su cas, no ta cuadra cu e fecha riba cual a transferi e placa pa Leoncita den cuadro di benta di su accionnan den Deshaun. Esaki ya caba ta kita un parti di e credibilidad den declaracion di Gen Roga.
Aunke cu hues ta bisa cu e por haya e situacion straño, pero mirando cu esaki t’e unico prueba den e dossier for di cual por deduci cu tin regalo haci na Benny Sevinger pa haya fabor, e fechanan cu no ta cuadra, e testigo no sa sigur kico tabatin den e envelop, ta haci cu corte a conclui cu no por uza declaracion di Gen Roga como prueba. P’e motibo aki a declara Benny Sevinger liber di “passieve omkoping”.
