Sindicato di Polis (SPA) a duna un declaracion amplio y detaya riba e caso, caminda kier persigui dos agente policial. Durante programa di Enfoke, Presidente di SPA Rodney Solognier a haya oportunidad di duna punto di bista y con e sindicato ta para, pa locual ta trata e caso aki.
Solognier, den su entrevista a duna di conoce cu no solamente como president di sindicato pero tambe como hefe di e dos agentenan aki, cu ta cay directamente bou su mando na warda di Santa Cruz, e por conta exactamente kico tabata biba tur dia cu e persona/fayecido aki en cuestion.
E fayecido Bermudez ta un persona conoci pa polis y ta un cliente vast di districto di Santa Cruz. Ora menciona cu e ta un vaste klant, kier bisa cu e persona aki ta bon conoci pa masha hopi aña caba pa tur polis cu ta trata na e warda di Santa Cruz debi na e situacion/ problema social cu tin andando na e adres ey pa basta tempo caba.
Ultimo asistencia na e adres ey desafortunadamente cos no a bay manera lo a desea. Ta di opinion cu si acaso un officier, un hues y/of henter e departamento concerni a observa e caso y ta mira cu no tin motibo pa persigui e dos agentenan aki. Nan a haci nan trabou y no ta mira dicon awo despues di casi tres aña ta bay busca pa persigui e dos polisnan aki.
Ta comprensivo pa e situacion, como famia ta sinti malo y ta algo cu por pasa cada un di nos, nos tur ta stima nos famia y lo busca derecho cual no ta algo cu ta kita for di dje. Solognier a indica cu entre e victima y e supuesto ‘sospechosonan’ tin un henter un instancia entre medio y tin cu para firme pa locual cu decision tuma.
Su bida tabata na peliger
For di Solognier por a scucha cu e polis en cuestion tabatin un decision hopi lihe pa tuma prome cu su bida lo tabata den peliger di morto. Di un distancia di 80 cm, e mester a pensa y actua pa asina scapa su mes di muy probablemente e bira e victima den e caso aki. Na momento cu presenta na un asistencia, na un cas of alocacion, den e temponan aki no sa kico pa spera y ken ta bay topa cu ne.
Un situacion tragico por ripiti caminda ta bolbe haya un polis, eherciendo su trabou, ta perde su bida den pleno servicio di trabou. Ta na su luga pa recorda gobierno, cu e situacion ta serio, cu tin di pone atencion na locual ta trata e problematica di salud mental, no por sigui trata di atende cu e hendenan , nan tin un enfermedad y no toca polis pa atende cu ne.
Famia a pone presion consistente
Despues cu famia a pone asina hopi presion y despues di scucha pakico tabatin tanto rumor (sin bay den detaye), ta bay trece dos colega di cual por papia hopi bon di nan. Polis (Boekhoudt entre otro ) cu ta traha manera debe ser, cu animo, dedica y cu tin biaha mester te hasta ten’e pa e no ranca sali bay pa asistencia.
Demotiva polis trahado
Presidente di SPA ta sinti cu un caso contra nan, despues di tanto tempo y cu a constata caba cu no tin motibo pa persiguinan, lo frustra nan carera como polis, lo demotiva aun mas, no solamente e polisnan aki pero e resto di Korps, cu ya caba ta basta demotiva. A mira hopi polis, pa diferente motibo, perde nan trabou y awo ta pone na riesgo dos colega mas den e incertidumbre aki.
No tin claridad kico lo bay pasa
Tin apenas dos dia cu a haya informacion di kico ta tumando luga y intencion cu tin di bay persigui e dos coleganan aki. Algun luna atras, officier a tuma contacto na warda di polis y pidi pa nan nomber, como cu no tin nada di sconde, a duna nan nomber y for di aki a informa cu lo bay tin un reconstruccion di e suceso pa asina por determina kico a tuma luga y asina cera e caso.
Noticia cu lo bay persigui e polisnan a dal duro
Durante e siman aki, a informa Solognier cu nan ta bay persigui e dos agentenan. Un noticia cu a dal hopi duro cerca tur colega. No ta solamente basa riba e caso aki, pero pone cu Husticia, Ministerio Publico /Hof ta bay persigui polis pasobra a haya presion di parti un of otro famia y cuminsa haci esaki cu demas colega, con e cos aki lo para. Tin di mira na final ken lo sali perhudica, cual por ta e mes un pueblo tambe.
