E capitan di e speedboat cu a haya problema den lama na Arashi diamars, ta calcula daño cu ta core den miles di florin.
For di diamars den oranan di anochi a cuminsa cu e proceso pa saca e speedboat, haciendo uzo di cadena pa lastr’e yega te na canto y laga sigur pa sigui cu e trabou diaranson mainta. E proceso aki a dura varios ora finalisando te rond di 2’or di madruga.
Diaranson mainta tempran a sigui cu e trabou, haciendo uzo di un trekker pa lant’e y pone riba trailer y transport’e pa e sitio unda cu mester bay haci evaluacion di e daño sufri.
E gastonan pa e proceso aki pa saca e speedboat, cu ta haya su mes envolvi pa di dos biaha den un accidente maritimo, a costa rond di shete mil florin florin. Awo ta bay evalua e daño sufri mes na e boto, motor, cual lo por yega te na 11 mil florin. Pues gastonan di casi 20 mil florin. E balor di un speedboat asina, pero nobo, ta costa rond di 25 mil dollar.
Segun a wordo splica, e accidente aki tabata un negligencia di e capitan, kende a tira anker den e lama malo. Pero a resulta cu e anker no a gara y e boto a keda bini aden te ora cu el a pega den e santo. Ademas di esaki, e olanan fuerte a keda suta e speedboat, di 33 pia, te ora cu el a kentel, y cuminsa yena cu awa.
Manera 24ora.com a raporta ayera caba, no tabatin hende abordo.
