Coach di landamento Carine Vinck, conoci como Kimberly, a nace na Corsou. E ta yiu di mama Rubiano y tata di Corsou. El a cuminsa haci e deporte di landamento sincronisa na Corsou, pero a practica otro deporte tambe. El a haya e oportunidad pa bira manager y assistent di coach di Team Nacional di Canada Artistic Swimming. E ta orguyoso di forma parti dje team nacional y di a logra su soño.
Den un combersacion cu TREMPAN.COM. Vinck a conta cu el a cuminsa haci landamento sincronisa cu su cinco aña na Corsou. Su mayornan a hib’e un show na hotel di Corsou y aki tabatin un show di landamento sincronisa. Desde e momento ey el a gusta y nan a hinc’e den e deporte aki. Pero ya caba e tabata haci otro deporte manera gymnastic y judo, pero tambe a haci ballet. A hinc’e den e deporte aki na Corsou y te dia di awe e ta forma parti dje deporte cu e gusta.
Te cu su dies aña el a haci landamento sincronisa na Corsou, pero e coach Alba Torres a bin Aruba, di cual a lag’e sin un coach p’un aña y e no por a train. Pero despues su mayornan a bin biba na Aruba y aki un biaha mas el a cuminsa train cu Alba Torres. Aki el a forma parti dje team nacional y a competi te cu su diesocho aña.
BIRA COACH
Di eynan Kimberly a dicidi di bira un coach, cual e ta haciendo esaki pa diescinco aña. Pa dos aña el a coach na Aruba, pero a bay Colombia pa studia. Y di eynan el a coach pa basta aña na un institucion di landamento na Bogota, pero despues nan a contrat’e pa coach e seleccion. Awo e tin cuater mucha, dos junior y dos di 13-15 aña, cu ta forma parti dje seleccion di Colombia.
Tempo e tabata coach pa Aruba, un di e competencianan a tuma luga na Calgary, Canada. Aki el a bay cu un team di 12U y tabatin un clinica di coach y hues. Un orador a papia riba e programa di desaroyo di atleta di termina largo (long term athletic development program) y el a stima e programa ey. Na momento cu el a yega Colombia, el a uza e programa ey cu su muchanan na Colombia. E ta haya cu e programa ta funciona y p’esey e tin su muchanan den seleccion.
El a gusta programa di Canada, pasobra semper nan ta e promenan pa bin c’un programa nobo, cambia e sistema di hues. Canada ta adelanta den programa. Su deseo semper tabata pa ta na Canada y mira con ta desaroya e programa eynan. Durante pandemia tabata un poco dificil y el a busca un chens na Canada. Aña pasa pa dies luna el a haya trabou na BC British Columbia na Victoria. Di eynan el a aplica cu Canada Artistic Swimming y awo e ta manager dje team.
Pa mas lesa TREMPAN.COM.
