Algun ora despues cu e organisacion mundial di salud (WHO) a declara e enfermedad Coronavirus como un epidemia mundial, ata cifranan nobo ta mustra un crecemento den e cantidad di casonan di morto registra. E cantidad di mortonan a subi te na 213 y mas ainda e cantidad di casonan confirma a surpasa 8.100 pashent na China so! Mientrastanto ta teme cu no lo dura mucho mas prome cu e epidemia contagia mundo henter.
Manera cu nos a informa mas trempan, WHO a declara e coronavirus como un emergencia di salud publico mundial. Ya caba a raporta mas di 100 caso confirma den 20 luganan pafo di China, por ehempel na India y Filipinas, cu a caba di raporta nan prome casonan. Di otro banda, na China mes tin mas o menos 60 miyon habitante practicamente “preso den nan mesun ciudad”, pa mas di un siman caba. Ta teme cu nan por ta infecta y asina kier evita cu ta sigui plama e virus.
Otro paisnan grandi manera ta Merca, Inglatera, Hapon y otronan ta trahando duro pa manda busca tur nan ciudadanonan pega na China, specificamente esunnan na Wuhan.
Pa loke ta e cantidad di mortonan, awe diahuebs so a anuncia na Hubei, cu ta e provincia unda Wuhan ta situa, di no menos di 42 caso adicional di morto. Esey a hisa e casonan den e provincia na 204 mientras cu na China henter e cantidad a yega 213.
