Ta algo masha bunita, ora hende ta biba uni cu otro, como famia, colega, bisiña,etc, pasobra e palabra di Dios ta bisa lo siguiente: Mira ki bon, y ki dushi ta, pa rumannan biba hunto den harmonia.
Esaki ta manera e zeta precioso riba cabes, cu ta core baha riba e barba, e barba di Aaron, y ta core baha te na e zom di su bisti.
E ta manera e serena di sero Hermon, cu ta baha riba e seronan di Sion: Pasobra ayanan Señor ta ordena e bendicion, bida pa semper. ( Salmo 133).
Mundo ta yen di odio , hende cu ta rabia cu otro sin motibo, hendenan envidioso, hende cu ta practica dictadura, guerra aki y guerra aya, violencia y division tur caminda, pero Dios ta stima union.
Ora nos ta uni, den boluntad di Dios, cosnan bon ta pasa, ora nos curason ta uni cu otro, Dios ta mira y ta ordena su bendicion pa nos.
Hopi biaha bo ta mira hende man tene, pero nan curason no ta uni, hopi biaha tin hopi grupo, management team, coalicion, grupo nan di servicio, pero nan curason no ta uni cu otro, es mas hopi di nan ta bringa pa nan propio interes, y esey no ta e union berdadero cu Dios kier.
Nos union mester ta manera un solo curpa, pasobra e curpa di Cristo ta un solo curpa, no ta existi dos curpa di Cristo, p’esey Señor kier mira nos uni den un solo pensamento, cual ta Su Boluntad, y ora ey nos por canta laga bo Gloria baha.
No laga nos lubida cu den e Aposento Alto tabatin 120 hende uni di curason den oracion, na e momento cu e Spirito Santo di Dios a baha.(Hechonan 2:1-4).
Na e mesa di e Santa Cena Cristo Hesus a proclama union di Su curpa, pa cada un tuma e pan como su curpa y e biña como Su sanger, pa nos por ta uno cu ne den tur cos.
E palabra di Dios ta bisa: E señalnan aki lo compaña esunnan cu ta kere den Mi nomber. Awel pa nos kere den Su nomber, nos mester ta uni cu nE, pasobra asina e ta confirma Su Palabra den nos. Y no laga nos lubida cu Palabra di Dios ta Poder di Dios.
Dios ta duna nos hopi advertencia, pa no haci wega cu nos stimacion un pa otro, pasobra hopi biaha nos ta tende hende ta expresa nan mes, sin tin e conocemento kico nan ta papia, y conociendo e berdad nos tin di pidi Dios misericordia.
E palabra di Dios ta bisa den 1 Juan 3:14-15: Nos sa cu nos a pasa di morto pa bida pasobra nos ta stima e rumannan. Esun cu no ta stima ta permanece den morto. Ken cu ta odia su ruman ta un matado, y boso sa cu ningun matado no tin bida eterno ta permanece den dje.
Ken cu confesa cu Hesus ta e Yiu di Dios, Dios ta permanece den dje, y e den Dios. Y nos a conoce y a kere e amor cu Dios tin pa nos.
Dios ta amor y esun cu ta permanece den amor ta permanece den Dios, y Dios ta permanece den dje.
Amor no conoce miedo, ma amor perfecto ta core cu miedo, pasobra miedo tin di haci cu castigo, esunnan cu tin miedo no a wordo haci perfecto den amor.( 1 Juan 3:15-17.
Laga e amor y e unidad di Dios briya den nos hogar, pasobra esey ta boluntad di Dios.
Pastoor Marcel Balootje.
