Por lo menos tres miembro di Parlamento di Aruba a opta pa tene un accion masha humilde mes pa spaar. Riba su mes esey ta bon noticis! Pero solamente si nan ta spaar pa caha di Gobierno y no pa enrikece nan mes cu plac’i pueblo, Ta spera nan yegada bek na Aruba te otro siman, pa mira si lo debolbe locual a cobra di mas, pa entrega bek na Departamento di Finansa.
E trio ta consisti di Marko Berlis, Ricky Hoek y Hendrik Tevreden di e fraccion di MEP. Contrario na mayoria parlamentario cu a hospeda den Novotel of Mercure Hotel na Den Haag, e trio aki a opta pa hunga sabi y scoge e hotel mas barata den e area. A keda na Easy Hotel, cu tin un tarifa di mas o menos $80 pa anochi. Compara cu Novotel di $150 pa anochi of Mercure cu ta cobra $110 pa anochi, di berdad cu e tarifa ta un ganga! Pero no esey so, sino pasobra tur parlamentario ta haya “daggeldvergoeding” basa riba e tarifa caro y estadia individual. Nunca a pensa cu tres homber lo drumi hunto, comparti cama, baño y privacidad, djis pa spaar nan cen!
Pa algun tempo caba, Parlamento di Aruba a vota pa paga su miembronan un suma di “daggeldvergoeding” di $350 pa dia. Den esey ta inclui transporte, estadia y cuminda. E ‘wega’ ta pa rek e estadia mas posibel. Por ehempel, e delegacion di Aruba a sali for di 28 di mei caba. E dia ey e “vergoeding” ta cuminsa core. Y aunke e reunion ta caba awe diabierna, mayoria a opta pa regresa te otro siman dia 10 di juni y otronan hasta te dia 12 di juni 2023. Asina facilmente ta cera 14 dia na $350 cu hunto ta bira $4900,=.
Awo, si Aruba tin poco “cha tiger” asina cu ta opta pa comparti camber pa nan gasta menos posibel di placa di pueblo, ta di spera cu nan entrega loke nan a “spaar” pa pueblo bek. Pasobra asina ta keda hunto pa e tres parlamentarionan aki por “resta” mas ora nan regresa Aruba. Pa esey e placa aki no tabata destina.
IPKO na juni 2023
Diahuebs ultimo e Interparlementair Koninkrijksoverleg IPKO a inicia na Den Haag, Hulanda. Durante e IPKO, e delegacionnan di Aruba, Corsou y Sint Maarten como tambe e delegacion di Staten-Generaal di Hulanda a reuni bou liderazgo di presidente di e comite di relacionnan den Reino Hulandes di Tweede Kamer, esta e parlamentaria Mariëlle Paul.
E delegacion di Aruba ta consisti di no menos cu 12 miembro, pues mas cu mita di nos Parlamento ta na Hulanda e siman aki y inicio di otro siman. Ta trata aki di Hendrik Tevreden (MEP), Marco Berlis (MEP), Raymond Hoek (MEP), Shailiny Tromp-Lee (MEP), Edgard Vrolijk (MEP), Mervin Wyatt-Ras (AVP), Mike de Meza (AVP), Marisol Lopez-Tromp (MAS), Misha Raymond (RAIZ), Miguel Mansur (Accion 21), Gerlien Croes (Independiente) y Ryçond Santos do Nascimento (Independiente).
E temanan cu a atende ta cambio climatico y su adaptacion, educacion, e siguiente conferencia di Reino, e siguridad di e data denter di Reino y e efecto y e procesamento di e colonialismo y e historia di sclavitud.
E Interparlementair Koninkrijksoverleg IPKO, ta e structura di consulta di e parlamentonan di e paisnan den Reino, ta tuma luga dos biaha pa aña. Na januari, e ta tuma luga na un di e paisnan den Caribe, na juni ta organisa e reunion na Eerste y Tweede Kamer na Den Haag
Agenda
E reunion a inicia diahuebs dia 1 di juni cu un apertura na Nieuwspoort. Aki e lidernan di e delegacionan di Caribe y e lider di e delegacion di e Staten-Generaaldelegatie, Paul Rosenmöller, a duna un presentacion tocante e desaroyonan mas reciente den e cuater paisnan. Despues, tabatin un intercambio tocante e puntonan di bista riba e siguridad di data denter di e paisnan den Reino.
Diabierna dia 2 di juni, IPKO ta reuni den e sala di e Tweede Kamer. Aki ta analisa e elaboracion adicional tocante e recomendacionnan di e Rapport van Bevindingen van het Adviescollege Dialooggroep Slavernijverleden.
E delegacionnan di IPKO ta intercambia idea di con, entre otro, e kwartiermakers di e Museo Nacional di Sclavitud. Riba e dia aki tambe ta disctuti e cambio climatico y e maneho denter di Reino. Ed Nijpels, kwartiermaker di e Mesa Climatico na Boneiro, ta duna un presentacion tocante su conseho recientemente publica.
E delegacionnan tambe ta discuti educacion denter di Reino y e stapnan cu a tuma a base di e rapport di e Ombudsman Nacional “Kopzorgen van Caribische Studenten”. E Ombudsman ta duna un presentacion tocante e tama aki.
Diasabra dia 3 di juni, IPKO ta bay realisa un bishita di trabou na Delft. Riba agenda tin un bishita na e Green Village di e universidad tecnico, un laboratorio pa innovacion sostenibel den area urbano.
E interparlementaire overleg ta termina dialuna 5 di juni cu e firmamento di e lista di acuerdo y cu un rueda di prensa hunto cu e presidentenan di e cuater delegacionnan.
Gran parti di e consultanan entre e delegacionnan ta publico y por siguinan directamente a traves di un transmision en bibo for di e website di Nieuwspoort (diahuebs) y riba e website di Tweede Kamer a traves di Current Events Channel (diabierna y dialuna). Claro 24ora.com tambe ta presente durante henter siman na Hulanda.
Tocante IPKO
E Reunion Interparlamentario di Reino (IPKO) ta e structura di reunion di parlamentonan di e paisnan den Reino Hulandes. Delegacion di Parlamento General y di Parlamento di Aruba, Corsou y Sint Maarten ta reuní dos biaha pa aña, un biaha na Hulanda y un biaha rotativo na un di e islanan Caribense, pa atende temanan di interes pa e paisnan dentro di Reino Hulandes.
