Awe tardi automobilistanan a tuma nota di un hoben riba bicicleta na altura di Eagle Beach cu un sienta di bais den man. Otro automobilista a bisa mesora cu nan ta testigo con e hoben, a caba di horta e sienta di un mountainbike, cu tabata staciona na e bike stand dilanti Eagle Beach.
E autor di e ladronicia ta un mucha homber riba un bicicleta di marca BMX. Riba e foto por mira claramente cu e tin e bara y sienta cerca di su curpa wanta. Obviamente e doño di e mountainbike no sa ken a horta su sienta y lo ta bon pa e entrega un keho na recherche. Y si abo ta reconoce e ladron riba bais aki, por fabor, yuda un victima door di avisa Polis mesora pa nan por yega na dje y pa e doño di e mountainbike por recupera su sienta bek.
Ta lamentabel pa un hende bay cana cant’i lama pa distrai y otronan ta opta pa asina sin mas, yega horta su sienta y bay cu ne, manera nad’un pasa. Ta bon cu otronan a mira y a saca su potret pa sirbi como evidencia y descurasha otro hende cu tin e mesun plan.
E grupo di fanaticonan di bicicleta awendia a crece hopi na Aruba y tur ta tira bista pa otro. Un bicicleta ta costoso y ningun ciclista ta sperando pa otronan yega horta nan bicicleta of parti di dje, sin cu tin consecuencia!
