Diasabra awor, 22 di juli, cuminsando pa 8:00, lo ta bay tin otro sambombaso di wega grandi den domino n’e Domino Square Garden na Calabas / Kudawecha. Dos eterno rival ta bin topa otro pa reken af algun debe bieu cu tin cu otro! E trabuconan di Bou Palo DT ta cla pa enfrenta e team cu uniform mas original, nada menos cu Team Snor bou guia dje flamante ‘Snor’ Perez.
Manera di custumber, entrada ta completamente gratis y e pasapalonan ora di halftime ta totalmente por nada. Luna pasa, e burdugunan di Team Snor a pasa raspa e ‘brochinan’ di Team Bou Palo, esta Team Bou Dak, malamente cu score di 21 – 11! Un abuso total cu mas cu claro e ‘fratelonan’ di Team Bou Palo lo kier venga cueste lo que cueste. Pero, segun informacion cu nos a obtene den un entrevista exclusivo c’un famoso hungado di domino cu bijnaam ‘lenga di coriente’, e ekipo di Bou Palo no ta sirbi ni pa reciclahe!
Un ta cos shonnan, un ta cos! Team Snor lo walk over atrobe riba nan? Captain Magda lo manda su A-Team raspa onkruid bou dje palo atrobe? Yega, diasabra awor cuminsando pa 8:00 pm na Domino Square Garden y haya sa pa bo mes!
