Diadomingo tardi Wardacosta a ricibi un notificacion di centrale post di polis encuanto un boto cu lo mester a bolter na altura di Santo Largo. Cu maximo urgencia un Metal Shark di Wardacosta a sali pa brinda asistencia na e hendenan.
Na yegada Metal Shark a topa un boto cu matricula A 2368 gebolter y cuater persona tabata wanta na e boto. E agentenan di Wardacosta a subi nan, dos hende homber y dos hende muhe, abordo di e Metal Shark.
E personanan a declara cu nan a sali cu e boto pa bay test esaki y un ola a bolter e boto. Wardacosta a hiba nan y e boto na e ex-pier di Brisas del Mar. E personanan a pasa den un susto, pero nan a yega bek tera sano y salvo.
