Diasabra mainta parti d Pastoor Hendrikstraat tabata cera. E motibo tabata pasobra tin trabounan andando pa basha abou un edificio bieu. A haci tur preparacion pa basha e edificio y DOW a duna ok y pone e material necesario pa cera caminda. E compania Fast Delivery ta bay habri otro localidad. E localidad aki ta den curason di San Nicolas den Pastoor Hendrikstraat.
Ta e ex-planta di ijs di famia Palm. Nan a bende e propiedad cu tin basta aña cera y bandona. E tabata hasta un molester pa e habitantenan den e area. Ora a tende cu e luga a ser bendi y a cuminsa basha e edificio abou, a sinti un aliento di satisfaccion cerca esnan cu ta biba eybanda. Ya caba e mapa ta cla y pintura etc ta full hinca den otro pa cuminsa cu e construccion di e localidad nobo.
E ta un Fast Delivery moderno y bunita cu lo eleva e bunitesa den e area. Richard Helder cu ta doño di Fast Delivery a splica cu e cooperacion di banconan t’ey basta bo cumpli. Nan tabata of ta hopi mas flexibel awendia pa asina pone economia desaroya y lanta cabes bek. Un extra localidad di Fast Delivery nifica tambe mas empleo. Fast Delivery tin ya caba 19 aña di existencia.
Richard Helder ta hopi contento cu e ampliacion. E ta gradici di curason na tur empleado cu awe ta dunando un sosten na e compania. Tin trahado cu t’ey for di prome dia cu Fast Delivery a habri. E trahadonan ta weso di lomba di e compania y awe nan ta cla pa sigui crece tambe cu e compania. Fast Delivery tin casi 70 empleado trahando tur dia pa brinda e servicio cu nan tin entre otro riba caya.
