Antibiotica ta remedi cu sea ta mata bacteria of ta percura pa stop e bacteria di crece den e curpa humano. Mayoria biaha antibiotica ta wordo receta pa tratamento di infeccion bacterial, entre otro pa tratamento di pulmon, garganta of e oreanan. Ta exsisti diferente antibiotica y cada uno ta wordo uza pa tratamento di diferente tipo di infeccion. Un dokter ta e unico persona cu por determina ki infeccion bo tin y cua antibiotica ta e miho tratamento pa bo.
Funccion
E funccion di antibiotica ta pa mata bacteria of percura pa stop e bacteria di multiplica, kiermen den caso cu bo tin un infeccion viral, por ehempel den caso di un griep of verkoud no ta necesario pa bo insisti cerca dokter pa bo haya un tratamento cu antibiotica (paso esaki no ta cura virus). Cada antibiotica tin nan propio structura kimico y ta determina di ki forma e ta afecta e curpa. E antibiotica cu ta wordo prescribi ta depende di ki infeccion tin y con grave e situacion di e pashent ta. P’esey tin pashent ta haya tratamento di antibiotica di 5 dia, otro ta haya tratamento di 7 dia of mas.
Caba e kuur
Ta importante pa un pashent bebe tur su antibiotica. Tin ora dokter ta uza e terminologia ‘caba e kuur’ referiendo na e peticion pa bo percura pa bebe tur antibiotica te na e ultimo cu tin den e paki. Hopi biaha nos tin e tendencia di sinti nos bon despues di e prome of di dos antibiotica, sinembargo ta sumamente importante pa bebe tur pa motibo cu ora bo cuminsa bebe e antibiotica automaticamente esaki ta cuminsa traha den bo curpa y ta (cuminsa) combati e bacteria. Generalmente bo ta cuminsa sinti bon di biaha. Pero na momento cu bo stop di bebe e antibiotica pasobra bo ta sintibo miho esey por tin consecuencia cu e antibiotica no a caba di haci su trabou di combati e infeccion completo. Bo por bira malo facilmente atrobe. P’esey semper sigui e recomendacion di e dokter of specialista cu ta pidi pa bo bebe e tratamento di antibiotica completo.
Alerta
E ta importante pa realisa cu no ta pa tur cos dokter lo receta antibiotica. Ultimo añanan mas y mas e mediconan ta ripara cu e bacterianan ta birando resistente pa antibiotica. Esaki por tin consecuencia fastioso pa e pashent paso por yega un momento cu ‘no tin nada mas’. Pa e motibo ey, hopi dokter ta cauteloso y lo receta ora tin indicacion medico pa duna un antibiotica. Tambe ta importante pa cada persona tuma precaucion por ehempel ora bo ta bay bishita un ser keri malo na hospital. Bacteria ta pasa di hende pa hende y mayoria biaha via man. Higiëna di man ta importante pa preveni transmission di bacterianan resistente. Tambe bacteria por pasa di bestia pa hende of bestia pa bestia. Importancia ta keda riba labamento constante di bo man pa no pega.
