Pa un temporada basta largo bishita pa un Cas di nos Grandinan no tabata posibel. Pero e aña aki un team na biblioteca bou coordinacion di Yosmar Maduro-Sneek a reactiva e proyecto ‘Conta cuenta na Cas di nos Grandinan’. Pa 3 luna a bishita na total 12 biaha un cas hunto cu 4 escritor local pa deleita e publico presente cu storia bunita y unico. Esaki ta e di 14 aña cu ta haci esaki.
Marco Christiaans, pareha Belen Kock-Marchena y Dolfi Kock y tambe Ruthy Vrieswijk ‘Lady Ruth’ a carga e programa di biblioteca su proyecto ‘Conta Cuenta na Cas di nos grandinan’. Nan a duna nan aporte den forma di conta cuenta, recita poesia, canta y toca musica.
Marco Christiaans ta contado di storia y autor di e buki ‘Perseverancia’. ‘Perseverancia’ ta un storia di e piscadonan di e area di Noord (Montserrat). Christiaans ta gusta lesa y skirbi y tin hopi conocemento di e bida di antes na Aruba. Christiaans a conta cuenta tocante casamento di antes y con esey tabata bay. Christiaans a haya e proyecto fantastico y a disfruta di cada presentacion.
Belen Kock-Marchena ta conoci pa su poesia y biblioteca tin varios di su publicacionnan den su coleccion, manera ‘Mas leu cu horizonte’, ‘Den bena di bida’ y ‘Vibrashon di amor’. Belen a traha hunto cu su casa y su yiu homber riba diferente otro publicacion. Dolfi Kock a skirbi buki pa mucha manera ‘E bruha brabo’, ‘Bon mucha???… tur dia!!’, ‘E gulido golos’.
Tanto Belen como Dolfi a traha hopi aña den enseñansa na Aruba y tur dos ya a baha cu pensioen pero nan ta keda activo y semper dispuesto pa conta storia y recita poema. Belen y Dolfi a presenta bunita poema. A haci un sketch imitando e papia di diferente cultura, manera di Corsou, Boneiro y Surnam. Un berdadero talento pa haci esaki. Tambe a canta hunto cu nos Grandinan y conta cosnan/custumbernan di antes.
Ruth Vrieswijk-Bergen a publica coleccionnan di poema titula ‘Alegria di Ruthy’ y ‘Poemanan di Ruthy’, ‘Sigui…inspira pa duna’, ‘Mi bida den un dia. Den silencio’ y e tin su propio columna den Bon Dia cu yama ‘Sabiduria den nos alegria’. Ruth a interactua cu nos Grandinan pa medio di su poesianan, canticanan crioyo y tambe un storia cu e mes a skirbi. Tambe declamacion di poesia di otro poeta cu tin nificacion profundo pa nos grandinan. Ruthy a pasa un cusinchi di curason cora rond pa cada presente brasa y asina comparti algo di nan sentimento.
Despues di e prome parti cu ta e presentacion di e autor, biblioteca a sigui cu un pelicula cortico cu tema consecutivamente di ‘e prome bishita di namora na cas’, ‘San Juan’ y ‘Pidimento di man di antes’. Hunto cu team media a presenta un bunita mainta pa nos Grandinan.
Di e manera aki biblioteca ta contribui presentando actividadnan alegre y informativo y hibando literatura pa nos grandinan cu ta biba den e diferente Cas pa nos Grandinan manera e.o.
Paviljoen San Pedro, Huize Maris Stella Savaneta, SABA San Nicolas y Cas Marie Savaneta. Ta percura pa documenta e presentacionnan aki pa medio di filmacion y potret. Service club ‘International club of Quota Aruba’ a duna sosten financiero pa e proyecto. Diabierna mainta 27 di juni, e proyecto a yega na su fin.
