Pa celebra Dia di Himno y Bandera, e deporte di landamento artistico lo tene nan competencia riba diasabra 19 di maart 2022 na e piscina Olimpico Roly Bislik na Savaneta. Durante mainta lo tin e parti tecnico na unda un grupo di principante cu recientemente a cuminsa cu e deporte lo mustra locual nan a siña pa asina purba di pasa pa e siguiente nivel. Despues lo sigui cu e parti tecnico di e categorianan 12 aña y 13-15 aña. Despues atardi lo tin e apertura oficial pa 5.30 pm cu desfile di tur atleta di Barracudas Artistic Swimming y despues lo continua cu e rutinanan riba musica. Henter Aruba ta cordialmente invita pa bin aprecia e bunita deporte aki.
Ken nos ta?
Barracudas Artistic Swimming Aruba desde 1973 a introduci e comunidad di Aruba na e bunita deporte di landamento sincronisa, den 2017 a cambia e nomber di e deporte pa landamento artistico. E meta principal di e club ta pa brinda atletanan oportunidadnan pa desaroya y prepara nan mes den e deporte pa competencianan internacional. Recientemente a habri e deporte pa mucha homber por participa mirando e desaroyonan den e deporte internationalmente. Pa mas informacion of pa conecta cu nos por bishita: Facebook @barracudas.aruba of nos website: www.barracudasaruba.com, Barracudas Artistic Swimming Aruba ta e unico club di Landamento Artistico na Aruba y ta afilia na Aruba Aquatics Federation cu na su turno ta miembro di F.I.N.A.
