E habitantenan di Seroe Patrishi ta fada di e situacion di awa sushi cu ta constantemente ta keda para y e holo desagradabel cu esaki ta saca no ta ni di papia mes.
Na unda e problema ta sinta, no ta conoci. Echo ta cu e no ta nada saludabel pa e habitantenan cu ta biba den e bario di Seroe Patrishi. Practicamente e bisiñanan no por mas cu e situacion aki.
Mester bisa cu e situacion aki no ta uno desconoci p’e habitantenan. Ta algo cu ta pasa cu (demasiado) regularidad. Y awo si, e habitantenan nan pasenshi a caba! Nan kier un solucion lo mas pronto posibel.
Niun hende no sa con e holo di riolering ta stroba e habitantenan di sinta pafo, relaha un rato. Merdia, bo no por ni habri bentana pa por aire por pasa, pa por sinti e brisa den cas, pasobra cu e holo stinki, e holo di pos cu e awa aki ta manda, ta algo inexplicabel.
DOW
Mientras cu nos representantenan di 24ora.com tabata n’e sitio, un truck di DOW tambe a yega n’e sitio pa asina tuma nota di e situacion y busca un solucion. A bin resulta cu sushi/vet acumula a haci cu e sistema di riolering a verstop.
Mester menciona cu, aunke cu DOW a bay pa duna asistencia, e no ta algo cu ta resorta bou di DOW. E compleho di cas den Sero Patrishi ta resorta bou di FCCA cu ta esun encarga cu mantencion di e casnan aki y tur lo relaciona cu nan.