Den e fondo di Algemene Ziektekosten Verzekering (AZV) ainda riba mesa tin e 60 miyon di florin di recorte. AZV ta en espera cu gobierno bin c’un proposicion nobo pa elimina e 60 miyon for di mesa.
ir. Edwin Jacobs, director di AZV, a splica cu nan ta hopi positivo cu den e proximo lunanan dilanti nan ta logra cu Gobierno di Aruba bini c’un proposicion nobo pa elimina e 60 miyon florin. E proposicion nobo ta cu nan ta bay traha di un cuadro financiero multi anual di cuater pa cinco aña. Esaki mester garantisa e fluho mas continuo di e fondonan pa sector di cuido unda por inverti.
Importante den esaki ta cu ultimo Minister di Salud Publico, Dangui Oduber, a logra cu e sector medico a bin hunto y yega na un acuerdo conhunto pa loke ta trata cuido den e proximo añanan. Esey ta bira e base di cual AZV ta bay traha riba e cuadro financiero multi anual. Cu esey, ta bay pone un base pa sigui percura cu cuido ta accesibel, di bon calidad y pagabel.
N’e momentonan aki AZV ta na 7.6% di e GDP y ta bay direccion di ocho porciento den e proximo ocho añanan. Segun Jacobs, e fondo ta hayando bon entrada, economia ta draai bon, e fondo ta tin su entradanan. E minister a tuma e decision na mei pa elimina e recorte di 5.5%, esey a pone cu e aña aki a bin adicional diescuater of diescinco miyon florin extra p’e sector.
Proposicion pa daggeldvergoeding
Pa loke ta trata e daggeldvergoeding pa esunnan cu ta bay afo, el a indica cu den e ultimo reunion cu minister a trata e topico ey. AZV ta bay presenta un proposicion pa adapt’e. E ta kere cu esey mester bay man den man cu e mehoracion cu e fondo ta bay bin cu ne.
