Den e plan di cinco ola di e organo ehecutivo AZV, tin dos ola cu ya caba ta implementa. Den ola dos tin e contribucion propio di e ‘begeleider’ cu ta bay cu e asegurado cu 300 florin. Ademas a reduci e ‘daggeld’ cu mita.
Banda di dje transporte interno tambe a conoce reduccion. E tarea cu AZV a haya tabata pa parti e peso di e recorte riba tur e actornan den e sector, cu tin di haci cu cuido medico. E actornan cu tin ta e asegurado, cuido medico y AZV. P’e asegurado den e parti di ola tres, tin riba mesa aworaki e proposicion pa introduccion di un contribucion propio pa cierto servicio medico.
Jacobs ta sigui splica cu no a tuma un decision final, pero ta importante pa por ta habri y transparente cu comunidad sa kico AZV ta trahando riba dje y kico por spera den 2022. Tin un proposicion pa introduccion di un contribucion propio na momento cu haci uzo di e servicio di prome auxilio na Hospital, cual ta uno di 15 florin. Tambe tin un proposicion pa contribui na e servicio di dokter di cas anochi, cual ta uno di 15 florin.
Pa cada remedi cu haya un recept p’e, pa botica, tin un contribucion di 2 florin. Pa cada test di laboratorio ta pidi un contribucion di 1 florin. Pa cada bishita/consulta na specialista medico ta pidi un suma di 5 florin. A scoge pa mantene e cuido di prome liña, cual ta dokter di cas liber di contribucion propio. Pa bay un dokter di cas no mester duna un contribucion. Por tin acceso tur momento na dokter di cas. Ta e Huisartsenpost (dokter na warda), ta caminda cu ta bay pidi un contribucion. Esey t’e proposicionnan cu a presenta y cu tin cu cana su caminda di formalisacion den ley. E tin cu pasa gobierno y parlamento ainda.
