Awe tardi AZV a informa dunadonan di servicio cu, no obstante tur esfuerso haci di nan banda, cu no a logra paga tur nan debenan awe. Kitando e 5,5% di e medida di austeridad riba tur dunado di servicio, awe no a logra paga mas cu 75% di nan gastonan. Esey ta inclui Hospital, specialistanan, dokternan di cas, boticanan y otronan.
A pidi comprension pa e situacion. Na mes momento Ruben Goedhoop a manda un carta pa e dunadonan di servicio den cual e ta splica nan cu asina placa drenta, cu lo sigui paga tur nan creditornan, aunke lo ta pocopoco te ora yega 100% di e gasto. Nan ta lamenta masha e situacion cu nan a haya nan mes aden pero esey ta debi cu placa no ta drentando manera normal.
Minister Dangui Oduber den un declaracion un rato pasa via Tele Aruba a admiti cu AZV no a logra cubri tur nan debenan. E mandatario a splica cu nos situacion economico ta den problema serio y cu AZV no ta hayando suficiente entrada pa cubri tur nan gastonan.
Como cu ainda Gobierno no a yega na acuerdo cu Gobierno di Hulanda, no tin e fondonan pa cubri e deficit den AZV. E mandatario ta spera cu den un siman di tempo por yega na un acuerdo pa Hulanda por transferi e fondonan necesario pa Aruba, pa nos por sigui cubri gastonan, manera entre otro AZV.
Di otro banda el a comparti un bon noticia cu Minister di Finansa, mr. Xiomara Maduro, a logra haya poco fondo adicional cu lo cubri e resto di 25% di debe cu a keda habri entre AZV y dunadonan di servicio. Ta spera cu entre diahuebs y diabierna lo a caba di cubri e locual falta pa paga ainda.
Minister Dangui Oduber a splica si cu esey ta un sosten temporal. AZV mester di mas o menos 1 miyon florin pa dia pa cubri su gastonan. Covid-19 a costa AZV caba mas di 15 miyon florin extra, mientras di otro banda nan entradanan a baha drasticamente. Pues mester bin un solucion of ayudo structura urgente, sino henter nos cuido medico ta “crash”, segun e Minister encarga cu salubridad publico a splica awor ey.
Tin urgencia pa yega na un solucion sino otro luna e problema ta mas serio ainda. Ta bisa esaki pasobra Gobierno tin rosea financiero pa dos siman mas. Si no haya ayudo, lo no tin placa pa draai salario di tur ambtenaar, di subsidio di salario, di FASE y pio ainda pa yuda AZV cubri su deficit structura debi na caida den entrada y aumento den gastonan!
