E siman aki a tuma luga bautismo di e uniform nobo di Ayo Domino Team. Presidente Jairo Kelly a gradici All To Car pa nan patrocinio y a adverti otro ekiponan den e campeonato di Aruba Domino Bond cu ta cuminsa e fin di siman aki, pa tene cuidou cu nan.
“Nos ta preparando di hopi aña caba, pero cu ora covid a bin aden, el a manera slow down e domino un tiki. Asina mes a keda hunga den famia pa sigui train y e aña aki ta e aña definitivo cu ta bay cuminsa bek,” asina Kelly a laga sa. Ayo Domino Team a haya hopi refuerso e aña aki cu e hungadonan nobo. Di aña 80 bin ariba Ayo Domino Team tin como cinco titulo di campeon y un 25 di subcampeon sigur, segun e president a splica.
Nan ta gradici hopi e gerencia di All To Car cu, cu brasa habri a duna ok pa patrocinio. A scoge un color cu tabatin den team y cu ta cuadra tambe cu esun di All To Car den su diseño. A mustra gerencia un idea y a keda hopi contento. A haci bautismo y awo ta bay pone e nomber di All To Car na halto den mundo di domino.
Ayo Domino Team tin un total di 29 miembro, cu un porcentahe casi igual entre hende homber y hende muhe. Kelly a bisa cu e ocho team cu tin den e campeonato mester tene cuenta e aña aki mester tin hopi cuidou cu e ekipo di Ayo paso nan ta bin todo por todo pa coy campeon.
