Pa Venezuela, e fecha 5 di juli ta uno importante. Rib’e dia aki e ta recorda cu na 1811 a proclama su independencia.
Na Aruba y rond mundo, e Venezolano cu a emigra y nan diaspora ta celebra e fecha historico aki. E dia aki ta dia di e Declaracion di Independencia di Venezuela y Dia di Fuerza Armada Nacional Bolivariana (FANB).
Aki na Aruba tambe, e diaspora Venezolano a tene un ofrenda floral na estatua di Libertador Simon Bolivar, yama tambe Libertador di America. Presente e mainta aki tabata t’ey tambe Minister Glenbert Croes, cu a bisa cu e dia aki ta un dia di gran orguyo tanto pa Venezuela como tambe e Venezolanonan rond mundo. Como pais ruman di Venezuela, Aruba ta convivi cu e sentimento di orguyo di e comunidad Venezolano y celebra e hermandad entre Aruba y Venezuela. Den e sentimento di hermandad, Minister Croes, na nomber di Gobierno di Aruba, a expresa sentimentonan di solidaridad pero tambe di felicidad, celebra e hermandad entre e dos pueblonan.
Como Minister di Integracion particularmente e mandatario a expresa di ta gradicido n’e comunidad Venezolano di Aruba, un comunidad cu ta stima nos isla, un comunidad trahado y cu ta inverti den nos economia. Ta un dia grandi cu a celebra cu gran afecto hunto cu e pueblo Venezolano.
Amabel Lugo Irizarry, Consul General di Republica Bolivariano di Venezuela na Aruba, a bisa di ta hopi orguyoso di por celebra e di 212 aña di e independencia, danki na Simon Bolivar, cu a saca Venezuela for di yugo Spaño y cu awendia nan por bisa cu nan ta liber y independiente.
E consul a bisa cu diaspora Venezolano sa cu tin presencia Venezolano rond mundo y tambe na Aruba, cu a ricibi nan cu brasa habri y cercania di Aruba cu Venezuela ta data di varios aña atras, un relacion di familiaridad. Semper mester reconoce e idea di Bolivar di ta un pueblo liber y respetuoso.
