E dia di job fair organisa pa The Aruba Food & Beverage Association (AF&BA) a yega unda cu cantidad di studiante di EPI a presenta na Renaissance Convention Center pa mira tur e trabounan cu un restaurant of bar tin pa ofrece.
E job fair cu ta tumando luga na Renaissance Convention Center a cuminsa pa 11:00 am y ta bay te cu 8:00 pm y no ta cobra pa entrada. Esaki ta e miho oportunidad pa cuminsa of impulsa bo carera den e sector di horeca. Bou di e mesun dak aki por haya un seleccion di restaurant y bar elite di Aruba. Entrada ta completamente gratis y e negoshinan lo presenta nan mes. Bo no lo haya un miho oportunidad pa busca un trabou den e industria dinamico, exitoso y agradabel aki.
E evento ta habri pa tur profesional experiencia cu ta buscando oportunidad pa impulsa nan carera, como tambe pa talento nobo di horeca cu ta buscando pa start un carera den un restaurant of bar, incluso hotel. Tambe e ta un evento ideal pa esunnan cu a caba di gradua y kier duna nan soñonan hala of ta desea di perfecciona nan habilidad di entrevista of interaccion cu un compania.
Carolina Merryweather-Raven, presidente di Aruba Food & Beverage Association, a indica cu e dia ta bayendo bon y a cuminsa e mainta c’un porta yen. Tin un grupo di 50 studiante di EPI ta terminando nan estudio of ta buscando un luga pa haci nan stage, nan ta presente pa mira e vacaturanan cu tin. Tur hende ta buscando un conexion, unda cu tin ta busca trabou y restaurant ta buscando trahado. Tambe tin mas di 40 restaurant y hunto nan ta yega mas di 100 vacatura.
No perde e oportunidad aki y yega na Convention Center pa mira kico tur tin den e job fair.Pa mas informacion, bishita www.jobfairaruba.com. Ta conseha pa bin cu bo CV y si acaso no tin esaki, lo tin un ‘booth’ di AFBA caminda nan por yuda bo hinca esaki den otro.
Tambe ta bay tin dos seminario enfocando riba con pa prepara pa un entrevista di trabou, con pa bisti, kico pa papia y mucho mas, asina Merryweather-Raven a indica. Pasa na e booth di AFBA awe y registra pa esakinan y cera conoci cu e miho maneranan pa prepara bo pa e chens di haya un trabou den e sector di horeca.
