E productor di pelicula Arubiano, bibando na Hollywood, Jo Henriquez, a produci un comedia na Spaño, cu un elenco di artistanan Latino, incluyendo e famoso actriz y cantante, Maria Conchita Alonso (The Running Man), e actriz y sensacion di social media, Gaby Espino y Miss Universo, Alicia Machado, entre otro.
E comedia nobo y dibertido “He Matado a mi Marido!”, lo estrena den cinenan di Aruba diabierna, 8 di Maart, 2019, un siman despues di su estreno na Merca.
E pelicula ta skirbi y dirigi pa Francisco Lupini Basagoiti, kende Henriquez a topa durante su dianan den e scol prestigioso di cine di e Universidad di New York.
Henriquez a bisa cu semper el a keda impresiona pa e cortometraje di Lupini, y hunto cu su pareha Daniela Ruiz, nan a uni forsa cu e director, despues di a namora di e script.
E comedy noir ireverente ta centra riba e personahe di Alonso, Remedios, un muhe desespera kende accidentalmente ta mata su casa infiel riba e dia cu e ta anfitrion di un fiesta grandi na honor di su reciente premio Pritzker.
E huespednan cu mester yega den algun ora y su famia desmorona, e mester sobrevivi e dolor di e angustia y un anochi di celebracionnan desenfrena sin wordo descubri.
¡He Matado a mi Marido! ta un “melting pot” di culturanan Hispano. E storia ta tuma luga na Miami y ta wordo filma completamente na Spaño cu artistanan for di varios pais den Latino America y Spaña.
Mientras cu cada actor ta trece un tiki di su cultura, e comedia y storia ta universal y cada ser humano, sin importa su idioma of cultura, lo hari hunto cu e personahenan.
E tono di e pelicula ta ireverente, y ta aborda temanan social manera empoderamento di e hende muhe, romance, sexo, sexualidad, discriminacion di clase y rasa, cu un dosis grandi di harimento y erornan politico.
E banda sonora di e pelicula ta presenta e single nobo di Maria Conchita, “Ya no mas”, un himno conmovedor di e empoderamento y liberacion di e muhernan cu a wordo lansa internacionalmente riba dia 1 di Februari ultimo.
Completando e elenco principal ta Assumpta Serna (Matador, The Borgias, The Craft), como Berta, e housekeeper fiel y dibertido di Remedios, Eduardo Yañez (Destilando Amor) como Pepe, e jardinero atrevido, Guy Ecker (Eva Luna), como Piero, e casa infiel, miss Universo, Alicia Machado, como Telma, e tanta loco y e actriz y sensacion di social media, Gaby Espino, como e amante inkieto (Mas sabe e diablo).
“Mi ta hopi orguyoso di e pelicula aki y orguyoso di a haci e pelicula aki cu ta sirbi e comunidad Caribense y Latino,” Henriquez a bisa, “kende a crece na Aruba, e film tin cierto familiaridad na mi y mi ta specialmente orguyoso pa trece esaki na e Cinema na Aruba, caminda cu henter Aruba por bin mira e pelicula riba e pantaya grandi.”
Dato Dibertido: Cantante Landa Henriquez, mama di Jo Henriquez, ta figura e voz cantante di e actriz principal Assumpta Serna den e pelicula.
