Den cuadro di Dia Mundial di Agricultura, Departamento di Agricultura, Cria y Pesca (Santa Rosa), ta uni na e celebracion aki, motivando e agricultor sea principiante of esun mas avansa.
Segun vocero di Santa Rosa, Randy Maduro, for di un principio nan t’ey cu e agricultor. For di momento cu e haya su tereno te na momento cu e cuminsa planta y haya su producto final.
Pa loke ta interes, Maduro a comenta cu mas ta e hobennan cu ta motiva pa planta. Den 2020 por a tuma nota di e cantidad di persona cua pidi conseho y a cumpra simia na Santa Rosa.
“Door cu hende tabatin mas tempo na cas, no tabatin otro cos di haci, nan a pensa di bay planta algo, cual Santa Rosa ta sumamente contento cu e interes a lanta mas pa planta un skina na cas, cuminsando na algo chikito y despues ta mira si di berdad ta pasiona cu esaki, por bira mas grandi,” ta loke Maduro a comenta.
Santa Rosa ta conseha na tur esunnan cu ta cuminsa den escalanan mas chikito, wak den cushina kico ta alimenta di dje tur dia.
Santa Rosa ta conta cu por lo menos 200 persona cu ta registra como agricultor y por mira cu e cantidad por crece. Ta pa e motibo aki mes ta un bon idea pa acerca Santa Rosa, registra pa asina haya informacion di loke kier busca eyfo.
Pa cobertura mas amplio lesa edicion di TREMPAN mañan.
