Den transcurso di aña ta hopi esfuerso a haci pa yega na un acuerdo cu WEB Aruba NV pa por haya awa pa Sector Primario. Tabata esfuerso cu tabata mustra casi imposibel cu hopi conseho y deliberacion pa por a logra yega na un bon acuerdo y entendimento.
Sector Primario ta keda un sector hopi importante aki na Aruba ora bo kier papia di siguridad di cuminda. Importante tambe ta pa por logra tur esaki pa sector primario mester di awa. Awa ta keda e parti hopi esencial pa por yega na e metanan concretisa. Sin awa no tin bida. Metanan cu bo por tin productonan local pa abastece e demanda. Sin awa esaki hamas por ta posibel. Mester duna credito na Gobierno di Aruba e tempo ey pa haci esfuerso di su banda pa asina logra tambe ‘Awa pa Agricola’.
Despues cu esaki a concretisa y realisa di parti Gobierno di Aruba, Departamento di Agricultura, cria y pesca y WEB Aruba NV a yega e momento pa haci e prome entrega di e meter di awa basa riba un tarifa ahusta special pa Sector Primario. E suma aki ta di 5.50 florin fiho pa uzo di e awa aki. Pa haci e entrega di e meternan di awa na e tarifa special aki, Santa Rosa hunto cu WEB Aruba NV tin varios rekisito pa e productornan local mester cumpli cu ne pa yega na remarke. Cumpliendo cu e puntonan den un contract WEB Aruba NV a haci e entreganan di e meter di awa hunto cu e tempo ey ex-minister Crispin Romero kende cu e tempo ey Sector Primario tabata resorta.
Un di e puntonan den e contract di WEB Aruba NV hunto cu Departamento di Agricultura, Cria y Pesca, Santa Rosa ta cu cada tanto tempo Departamento di Agricultura, Cria y Pesca Santa Rosa tin e tarea pa haci un bishita pa asina controla con e uzo di awa di e tarifa ahusta aki di 5.50 ta bay. Si ta compliendo cu e puntonan den e contracto manera entre otro con e produccion ta bayendo. Si ta uzando e awa pa e meta cu e ta destina p’e. Mira tambe si ta haci uzo di e sistemanan di irigacion. Kico ta e diferente producto cu ta planta. Cuanto ta e cantidad cu ta planta y cosecha final. Kico ta wordo planta. Scucha tambe kico por ta nan opinion pa cu e meter di awa cu e tarifa special aki. E parti mas esencial di henter e proceso aki di parti di Departamento di Agricultura, Cria y Pesca, Santa Rosa ta keda duna conseho con pa atende cu e awa y con na un mihor forma atende bo cultivo y pa mas tanto bo beneficia di e awa aki y mantene bo gasto di awa controlabel.
Generalmente na momento cu Santa Rosa a bishita tur esunnan cu tin e meter specifico aki tur tabata tin bon comentario y sigur nan ta sumamente contento y agradicido pa e ayudo aki pa asina nan por sigui cultiva y mantene na gasto di awa na un prijs pagabel.
Di parti Santa Rosa nos lo sigui haci control y duna conseho na bienestar di Sector Primario di Aruba.
