Partido AVP a tene un reunion urgente cu porta cera pa asina trata diferente topico preocupante. E miembronan di AVP ta mira cu e situacion di Aruba ta uno preocupante.
mr. Gerlien Croes, parlamentario (AVP), a expresa cu e situacion di Aruba ta hopi preocupante y pueblo sa esey. E miembro- y activistanan di partido AVP a haci peticion pa reuni, unda a toca diferente punto, tambe riba plan di accion cu e partido lo bay tuma riba e situacion di Aruba. Den e ultimo añanan a tuma luga hopi decision cu e pais aki no por carga mas. Pueblo ta bibando e dolornan y hopi cos eyfo ta mustra bunita, pero e politiconan diariamente ta experencia situacion hopi doloroso. Nan sa cu e grandinan como e hobennan, tin reto grandisimo n’e momentonan aki y no ta trata nan manera debe ser. Aruba no por soporta mas medida.
A mira caba con Minister di Finansa ta trahando riba e BBO na frontera, ainda ta hiba un lucha riba prijs di awa y coriente cu no ta baha manera a bisa. Si keda acepta cu e pais aki ta maneha y goberna n’e forma actual, na final di dia no ta keda nada mas p’e futuro generacionnan cu ta bin, p’e hobennan, p’e yiunan. Croes no ta kere cu esaki ta e Aruba cu pueblo a traha duro y lucha p’e, di cual diasabra awo ta celebra 18 di maart. Cu orguyo ta celebra Dia di Himno y Bandera, pero e realidad ta loke ta sconde tra’i e orguyo ta e dolor cu e pais ta bibando aden, falta di entrada, costo di bida halto.
mr. dr. Ryçond Santos do Nascimento, parlamentario (AVP), a indica cu pueblo ta hopi duidelijk riba loke nan kier y esey ta pa AVP duna cara riba e problemanan importante dje pais. Un otro punto ta cu e partido mester t’ey presente den comunidad, mustrando e comunidad, no solamente como politico cual tin suficiente riba e pais, pero hende cu ta preocupa cu hende. Pero tambe cu e problemanan cu ta biba den e comunidad aki.
Partido AVP no por keda keto p’e problemanan cu ta biba den comunidad aki. Nan no por core p’e responsabilidad di e futuro dje pais aki. E realidad ta cu tin asina hopi partido y politico, pero na mes momento ta mira oportunismo.
drs. Mervin Wyatt-Ras, parlamentario (AVP), a indica cu nan a bini hunto pa scucha e dolor di pueblo riba costo di bida cu ta asina halto. A comproba cu hende no por mas. E ta un situacion cu continuamente hende ya no tin hopi mas den cartera, e mamanan soltera cu ta gana un salario minimo, ta cobra onderstand di 450 florin pa luna, nan tin cu hinca man den cartera pa paga tur gasto y awo nan mester paga remedi pa nan yiu. E positieve lijst introduci ta un medida contra pueblo. E pueblo no por mas. Pa loke ta hospital, unda cu hende tin derecho di haya cuido medico, awo ta keda sin esaki, pasobra e proyecto no por keda cla. Esaki tin di haber cu e Minister di Salud Publico, Dangui Oduber, no por finalis’e, e ta boicotia e contratista cu esaki mester bay.
