Den un serie di pregunta riba pobresa creciente y alarmante na Aruba e lider di fraccion di AVP, mr. Mike Eman ta cuminsa na puntra Prome Minister Evelyn Wever-Croes si e “Minister ta consciente di aumento dramatico di costo di bida y gasto di un famia na Aruba desde 2018 pa 2022?”.
Den bishita y reunion di bario e lider di fraccion di AVP mr. Mike Eman ta bisa cu e ta haya confirmacion di e pobresa y di e dolor den pueblo. “Costo di bida ta subiendo den un forma alarmante. Ta obvio cu e medidanan cu Gabinete Wever- Croes a implementa durante e ultimo añanan a impacta e cifra di inflacion severamente. Na 2017 ainda inflacion tabata menos cu 0%, esta – 0.6%. Na 2018 y 2019 esaki a subi drasticamente cu e medidadanan di Gabinete Wever-Croes.
Redoblacion di BBO y e echo cu a pone e BBO tambe riba diferente otro cos cu tabata exonera, manera transacionnan bancario y seguro a crea un efecto inflatorio adicional. Riba gasolin y diesel e impacto tabata dobel, 12%. Tambe e eliminacion di e descuento di 10 cent pa liter di gasolin y diesel tabatin un efecto negativo grandi”. Tur esaki segun e lider di fraccion di AVP, mr. ta haci Gabinete Wever-Croes responsabel pa e pobresa alarmante cu tin na Aruba.
E ta mustra cu den 2022 inflacion ta sigui e rumbo preocupante. Inflacion acumula door di e medidanan di Gabinete Wever-Croes tin un impacto dramatico riba costo di bida. Cifra di CBS ta confirma e aumento drastico aki. Segun cifra di CBS e bestaansminimum pa un persona pa luna na december 2017 tabata 2.066 florin y na april 2022 esaki a bira 2.382 florin, casi 400 florin mas pa luna pa bo por sobrevivi. E bestaansminimum na 2017 pa 4 persona, 2 adulto y 2 mucha tabata 4.338 florin y awor e ta 5.003 florin casi 700 mil florin pa luna mas pa bo por sobrevivi. Eman ta bisa cu e panorama socio-economico hustamente ta mustra un deterioro e ultimo añanan, es decir cu e 700 florin aki mas di gasto mensual ta pone cu nos pueblo ta empobreciendo na un forma alarmante.
Den periodo di gobernacion 2009-2017 e gobierno di e tempo ey no unicamente a tene inflacion abou, pero tambe a sostene e poder di compra di comunidad cu un maneho consciente di mantene e forsa di compra di comunidad. Asina a aumenta bijstand, salario minimo, pensioen di biehes, a introduci reparatie toeslag pa e empleadonan den sector priva, a introduci schoolkinderentoeslag p’e famianan di menos recurso.
Consistentemente a percura pa salario di e empleadonan publico mantene nan forsa di compra cu indexering, voorjaarspremie y najaarspremie. Eman ta bisa cu desde 2017 pa 2022 no tabatin ningun ahuste structural di apoyo pa e poder di compra di comunidad. Alcontrario cu e medidanan y ausencia di coreccion ta atras e poder di compra a keda bay di 2018 pa 2022. Cifra di Banco Central y CBS ta confirma esaki. Aruba ta empobreciendo den un forma penoso y alarmante.
Relaciona cu e pobresa alaramante aki e a haci Prome Minister Evelyn Wever- Croes e siguiente preguntanan ?
Minister ta consciente di aumento dramatico di costo di bida y gasto pa sobrevivi di un famia na Aruba desde 2018 pa 2022 ?
Minister ta consciente cu e aumento dramatico aki ta conduciendo na un pobresa preocupante na Aruba ?
Minister ta consciente cu e pobresa aki ta fracturando famianan na Aruba, creando hopi depresion y malestar. Un cu e otro tambe cu efecto riba salud di nos hendenan y riba siguridad den bario ?
Minister ta consciente cu no unicamente e maneho di 2009 pa 2017 di sosten di poder di compra a wordo para, pero tambe tur iniciativa cu tabata tuma pa sostene calidad di bida den barionan y fortifica e cohesion social a worde para ?
Minister ta consciente cu na e momentonan aki hustamente mester sostene esunnan di menos recurso ?
Minister ta consciente cu entre otro na FCCA ta aplicando aumento di huur na momento cu un persona haya schoolkinderenentoeslag pa e yiu cu ta bay scol ? Minister no ta kere cu bao di e condicionan actual di aumento dramatico di costo bida cu un compensacion cu a introduci pa cubri e gastonan di scol no mester wordo inculca den e draagkracht di e famia pa cu calculacion di prijs di huur di un cas social ?
Minister por informa con tin pensa pa sostene e miles di famianan cu ta cayendo pobresa y miseria na Aruba ?
Minister por informa con ta pensa di atende cu e negligencia di barionan desde 2018 cu a para tur programa di bario y cohesion social ?
Minister por informa pakico a para tambe tur e proyectonan di renobacion di bario ?
Minister por informa pakico ta neglisha e mantencion di e barionan y tur e embeyecimento y facilidadnan deportivo y recreacion cu a realisa entre 2009 – 2017 hustamente pa crea un ambiente positivo den e barionan ?
Loading…
Reload document 
Open in new tab 
