Lider di AVP, Mike Eman, ta hayando yamadanan tras di otro y awe tin un reunion importante, caminda cu e lo topa cu esnan di e grupo preocupa den comunidad. Aki ta trata di e grupo di esnan cu ta gritando pa motibo di un grondbelasting cu ta matando nan pisa.
Ex prome minister, a splica cu un cantidad di ciudadano a haya aanslagnan di grondbelasting, caminda cu ta mira cu e suma a aumenta dramaticamente pa hopi hende. Algun hende a haya reduccion, pero si wak e reduccionnan, nan a keda hopi chikito.
Miyones extra na Grond Belasting ta matando e pueblo
Posted by 24ora on Monday, June 3, 2019
E parti aki tambe, a compronde cu na final di cinco aña di e suma cu bo tin cu paga pa Grondbelasting, ta bay reevalua tur e propiedadnan na Aruba, caminda cu hasta taxatierapportnan e ciudadanonan mes mester laga traha pa loke ta trata e evaluacion cu lo tuma luga na 2021. Gran mayoria a haya aumento hopi grandi. Esnan cu tin un cas riba nan mesun nomber, a haya aumento. Esnan cu tin un cas bao di nomber di un empresa, a haya un aumento hopi dramatico tambe. Tin di compronde cu den e mundo di sector di inversionistanan tin un preocupacion hopi grandi cu esaki.
E preocupacionnan di inversionista ta bira preocupacion di AVP, pasobra hende ta perde trabao y prijs ta aumenta.Awe nochi a invita un fiscalista, Rita Oosterwijk, pa bin duna un splicacion di e cambio di ley cu a tuma luga. Ta invita tur esnan cu a haya e aanslagnan aki, cu si nan ta interesa pa wak kico ta nan derecho pa eventualmente bay den bezwaar. Gobierno a aplica e tarifa nobo aki segun expertonan ta bisa. Esnan cu ta conseha ciudadanonan na Aruba, cual ta e belastingadviseursnan, casi tur oficina a manda bisa nan clientenan cu segun nan, e aplicacion di e tarifa nobo ta enpugna cu ley.Awe nochi Rita Oosterwijk lo papia riba esey tambe. AVP mes ta haye sumamente lamentabel. Si mira e cantidad di medidanan cu a bin tras di otro di e gobierno aki, practicamente e cartera di nos ciudadanonan ta na werki caba y no tin espacio pa mas.
Na momento cu e gobierno a sinta, a bin cu redoblacion di BBO, a introduci tambe cu BBO ta wordo agrega riba no unicamente e productonan cu e tabata wordo aplica caba, pero tambe riba transaccionnan bancario. Banconan a cuminsa cobra ciudadanonan pa esey. Tambe pa transaccionnan di seguro. Por mira cu ciudadanonan tambe a wordo cobra BBO pa transaccionnan di seguro. Por mira aumento di gasolin dramaticamente. Gobierno a kita un descuento di 10 cen, cu tabata existi for di 2008 di tempo di minister Nilo Swaen y Gabinete Eman I y II a sigui cu e descuento di 10 cen aki. E gobierno aki a kit’e y hunto cu prijs internacional, prijs di gasolin a aumenta dramaticamente.
Na momento cu gobierno mester a aumente net hustamente durante e momento di e marcha, a ten’e. Pero a adverti simpatisantenan di AVP cu esaki ta un wega politico y cu esaki lo bin bek. Na apertura di Mei, por a mira cu e aumento di gasolin aki a bin.Tur e medidanan aki ta pa paga, no pa debe, manera cu e gobierno aki ta bisa, pero pa extra gastonan.
E exmandatario a menciona cu loke cu e gobierno anterior tabata gasta, compara cu e gobierno actual, nan ta gasta mucho mas. Riba un rapport di CFT, ta mustra cifranan di e realisacion di gastonan di e gobierno di AVP na 2017 y e aumento di e gobierno aki na 2018 cu a aumenta cu casi 100 miyon extra. Na 2019 tambe a bin un 20 pa 30 miyon extra. Ta papiando aki di casi 150 miyon florin extra di gasto cu si bo mira e pakete di medida, casi mita of mas di mita di e pakete di medida aki ta bayendo pa e gastonan adicional aki di gobierno.
Prome minister, Evelyn Wever-Croes, minister Xiomara Ruiz-Maduro, tur ta canando cu e engaño aki. Algun miembro di e fraccion di MEP ta cana cu e mesun engaño aki cu ta pa paga debe, mientras cu CFT ta bisa cu gobierno ta cayendo atras y gobierno a aumenta su gastonan cu mas di 150 miyon florin, cu tur e medidanan aki. Placa ta drenta pa por paga. Unda e placa aki ta bay? Si mira e personal, si mira friends & Familiy, ta trompicando riba otro den cocolishi. Y pueblo ta pagando tur dia. Nan cartera ta na werki.Ciudadanonan ta bisa Eman cu nan no por mas. Awe nochi, ta invita un y tur pa bin na cas di partido pa duna un splicacion. Tin diferente hurista banda di Rita Oosterwijk cu lo ta den audiencia tambe pa contesta preguntanan cu ciudadanonan por tin riba e tema di Grondbelasting aki, cu a aumenta dramaticamente. No tabata tin un dialogo, segun Eman. Tempo di e gobierno anterior, cualkier cos chikito cu kier a cambia, tabata tin un dialogo. Algo cu ta inaceptabel tambe ta cu no tin un overgangsbepaling. Cualkier ley cu ta haci un cambio asina grandi riba e situacion di nos conciudadanonan, ta pone un overgangsbepaling y bisa cu poco poco e cos aki por drenta na vigor, teniendo cuenta cu hendenan ta haya espacio y tempo pa por acomoda nan mes na e cambionan aki.
Esey tampoco tin aki. Eman tin di compronde di un reunion, caminda cu Evelyn Wever-Croes a bisa cu te na 2021 lo cuminsa cu e tarifa nobo. Awo ta aplik’e caba. Si esey ta e caso, cu el a bis’e den parlamento, e ora ta papiando di un engaño hopi grave cu na cualkier otro pais, e prome minister lo mester retira pa esey. No por bisa den parlamento tratando un ley, kico cu bo bisa den parlamento ora cu trata un ley, ta bira parti di historia di e ley y e interpretacion di e ley. Si a bisa den parlamento cu te na 2021 ta bay aplica e tarifa y despues ta aplik’e awo, ta un engaño hopi grave, cual ta forma un base pa apelacion y obhecion cu nos ciudadanonan por haci. Awe nochi lo duna e detaye pa 7’or, y ta invita tur esnan cu ta preocupa, pa yega y e miembronan di AVP lo tey pa duna informacion. Finalmente e conclusion ta enberdad ta cu e conseheronan fiscalista ta bisando, cu e cos aki ta enpugna cu ley, cas di partido lo duna mescos cu a duna e consulta pa esnan cu mester yena nan inkomstenbelasting, e yudansa pa por yena e obhecion.
