E situacion na AAA ta uno cu partido AVP a bin ta vociferando for di basta tempo caba. Segun lider di fraccion, parlamentario Marlon Sneek, den un rueda di prensa dilanti di aeropuerto, esaki lo bay bira e di cinco biaha cu AVP ta para eynan pa asina garantisa cu e entidad no ta bay abusa di trahadonan.
A trec’e mas cu un biaha dilanti, pero ta lamenta cu esnan cu ta prome yama pa defende e trahadonan, no ta haci esaki.Awo, atrobe nan ta bolbe haya informacion di trahadonan cu plannan ta sigui, manera cu AVP a bisa dia 24 di september para dilanti di Parlamento, cu plannan ta sigui pa manda e trahadonan cas. A mira sindicato sali bisa cu te cu dia 31 di december, ningun hende no lo wordo kita.
Esey sinembargo, ta e plan inicial.E plan inicial ta e 27 prome hendenan cu a duna nan nomber di nan mes cu nan lo kier bay, te promenan cu a bay. Y despues di dia 31 di december, tin un otro tek, cu ta mas of menos 50 trahado cu lo bay obligatoriamente.Desde dia 1 di januari 2021, e trahadonan aki lo no tin un trabao mas na AAA. Esey ta e realidad cu ta core pa basta luna. Awo tin algun hende cu kier reis pecho y bisa cu nan a logra.No a logra nada, segun Sneek. E mesun plan ta riba mesa. Manera cu tin di compronde, a cuminsa papia cu e trahadonan caba, pasobra ya nan tin e lista cla, ken ta esnan cu lo wordo manda cas.Loke cu AVP ta lamenta cu a yama e minister, pa e bin Parlamento bin responsalisa su mes y e no a haci esaki.
El a para den prensa, manera cu conoce caba, dilanti di camara y grita cu nada no ta bay door, e ta para tur cos. Ta un mentira flagrante.Pasobra locual cu ta bay pasa ta, e trahadonan aki desde dia 1 di januari 2021 lo bay perde nan trabao. AVP a pidi un reunion, a manda un carta siman pasa, dia 24 di september, un rapel, bisando e presidente di parlamento pa pidi un reunion cu e minister, Dangui Oduber, pa atende e situacion di e trahadonan aki y te dia di awe, presidente no ta yamando e reunion.E gobierno aki ta sconde y keda sconde y trahadonan ta keda den un incertidumbre.
E ta inaceptabel cu un compania, despues cu a haya un prestamo di 500 miyon florin. Esey ta nifica cu e compania aki mester a mustra cifranan cu ta solvabel.Un compania cu Parlamento por a mira cu tur aña tin un ganashi, cifranan ta mustra entre 18 y 23 miyon florin pa aña cu nan ta gana nan entrada, y por mira cu awe kier sacrifica trahado.Esaki ta inaceptabel segun Sneek. Un compania cu a demostra cu tabata tin cifranan positivo tur aña, a bay busca nan prestamo.
Banda di esaki, e mesun compania aki ta e compania cu ta haci uzo di FASE. No ta for di nan saco den e caso aki nan tin cu bay paga e gastonan di trahado tur luna. Nan ta haya sosten di gobierno via FASE y esaki ta e compania cu ta mandando trahadonan cas. Pa AVP esaki sigur ta di lamenta. E ta inaceptabel cu den e situacion aki di pandemia, un compania manera AAA, cu ta strika entre 156 y 164 miyon florin pa aña ta bay manda trahado cas.No ta mira algo cu nan mes ta sacrificando. Esaki ta loke cu trahadonan ta manda.
Tin un top cu ta strika placa, cu ta cobra un productie bonus entre 25 y 75 mil florin. Tin un top cu averahe ta cobra 20 salario pa aña den tur e bonusnan cu nan ta cobra. Haya autonan di 90 mil florin pa core rond cu ne. Haya pasashi pa bay bek y bin bek di caminda cu nan ta origina. Y e homber chikito, e Arubiano aki ta esun cu tin cu bay sufri. Pa AVP esaki ta inaceptabel. A kere cu fraccion di MEP tambe tin e trahadonan na curason. A kere cu e fraccion di RED tambe tin e trahadonan na curason. A kere tambe cu e fraccion di POR tin e trahadonan na curason.
Y lo a para banda di AVP y exigi minister Dangui Oduber pa bin Parlamento y duna cuenta, bin splica Parlamento ta kico ta e opdracht cu el a duna hunta di supervision y hunta di comisario, pa duna gerencia di AAA pa traha cun’e.Ta inaceptabel cu un compania manera esaki, cu ta strika placa, ta traha gran cantidad di ganashi, awe ta bay sacrifica su trahadonan, despues di haci uzo di un FASE, despues di haci uzo di un prestamo di 500 miyon, awe e cabes di e trahadonan lo bay lora.
E pregunta cu ta keda den e cabes di e trahadonan ta, ora cu caba di ehecuta e plan total, kico ta bay pasa. Ora cu bin cu expansion, bin cu mas port, kico ta bay pasa. E ora si ta bay busca trahado nobo? Mientras cu a sacrifica nan un paar di siman of luna prome? E cos aki ta inaceptabel.
E trahadonan a bisa, si cos ta dificil, nan ta willing pa sinta na mesa, pa wak si mester sacrifica seis luna of un aña mas, nan ta dispuesto pa haci’e, pa ora cos drecha nan bay bek den nan posicion original.Pero nan no ta dispuesto pa perde nan trabao. Cada un di nan tin responsabilidad. Cada un di nan tin un cas pa paga, tin un famia pa cria y awe nan trabao ta na peliger.
