Recientemente Ministerio Publico a cera e caso Avestruz contra e naamoze vennootschap Pristine Estates NV di Alfredo Lowenstein, cu ta doño di e edificio di Holiday Inn Resort & Casino, como sospechoso den e investigacion penal, pa medio di un transaccion di 1 miyon florin (Afl. 1.000.000,=).
Ta sospecha Pristine Estates NV di actieve omkoping (soborno). Den esaki e lo a paga placa bou mesa pa haya tereno of pa haya un beneficio cu tereno di gobierno. Ministerio Publico ta di opinion cu tin suficiente prueba contra Pristine Estates NV y cu e hecho pa cual Ministerio Publico a dagvaard Pristine Estates NV. Pero, considerando tur hecho y circunstancia bao di cual e specificacion cu no tin partinan perhudica cu interesnan cu na cualkier forma lo por wordo daña na momento di un transaccion, Ministerio Publico ta mira un transaccion como e afdoening mas apropia pa Pristine Estates NV.
Ta bon pa splica cu fiscal di Ministerio Publco tin dos opcion den e caso aki. Sea ta hiba e compania dilanti hues pa soborno di un minister y di cual e compania por haya un multa di solamente shen mil florin of ta yega na un transaccion cu ne pafo di corte y asina evita cu e ta haya un castigo penal riba nan nomber. A scoge pa e ultimo, pasobra ey no tin un limite di con halto e transaccion por ta.
Alabes, ora di yega na e transaccion, a laga conta cu e sospechoso Pristine Estates NV ta un rechtspersoon. Contra un rechtspersoon hues penal por impone solamente sancion financiero. E boet maximo cu un hues penal por impone pa e hecho aki ta Afl 100.000,=.
Ministerio Publico ta di opinion cu e suma total di e transaccion, esta un miyon florin, ta husto pa cu e hechonan y pa cu e rol specifico cu e NV tabatin den Avestruz. Tanto Ministerio Publico como Pristine Estates NV ta considera e transaccion aki un afdoening apropia di e caso penal, mirando tur e hechonan y e circunstancianan.
Cu Pristine Estates NV a cera e transaccion aki no kiermen cu Pristine Estates NV ta admiti culpabilidad penal y tampoco cu e ta admiti di lo a ricibi algun benificio ilegalmente. Ministerio Publico ta enfatisa cu e transaccion no tin influencia riba e procedura penal contra e otro sospechosonan den e caso.
