Dia 2 di october 2019 Ministerio Publico a realisa varios entrada hudicial cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. Esakinan a tuma luga den cuadro di un investigacion penal di Landsrecherche pa posibel delito di corupcion y otro echo castigabel posiblemente cometi relaciona cu otorgamento di terenonan di gobierno.
Caso Avestruz den su totalidad, pues teniendo na cuenta acusacion di tur partido envolvi, tin un total di nuebe acusacion penal cu ta mara den nos codigo penal. Prome den esaki ta omkoping (activo y pasivo), maluzo di poder como trahado publico, labamento di placa, enrikecemento propio, fraude, falsificacion di documento, malversacion di placa y destruccion di evidencia.
Abogado di un di e sospechosonan den e caso aki, Leoncita Arends, mr. Doris Canwood a cuminsa na bisa cu ta un poco dificil pa bisa con e caso ta bayendo. A trece un hues-comisario for di St. Maarten pa bin scucha e testigonan. Esaki ta trece cierto tardansa cu ne, ya cu no ta tur dia por scucha un testigo.
Tin cierto testigo cu ta hopi importante y depende di kico nan testigo, por haci cu lo por bay scucha mas testigo.
Segun mr. Canwood ta dificil pa bisa si e caso lo sigui ainda e aña aki den corte ya cu e no tin bista di kico ta pasando cu e testigonan di e otro abogadonan. Den agenda (di Corte) lo mester caba september. Si no tin mas testigo, na october lo tin un regiezitting nobo udna cu lo bay over na pone un fecha. E ora tecnicamente lo por cuminsa na november of december.
Pero mr. Canwood a indica cu si sigui scucha mas testigo te september y den un proximo regiezitting bisa cu kier scucha mas testigo, basa riba kico a wordo bisa, esey ta haci cu por scucha e testigo te na october.
Pa un relato mas amplio, lesa bo corant digital TREMPAN.
