E investigacion Avestruz ta keto bay andando. E siman aki Landsrecherche a bolbe detene un persona den cuadro di delitonan di corupcion posiblemente cometi y otro hechonan castigabel relaciona cu dunamento di tereno di gobierno entre 2009 y 2017. Ta trata aki di e sospechoso Mary Hsing, kende mientrastanto a bay den libertad net un dia despues.
Desde 11 di april ultimo nuebe sospechoso a wordo deteni den e investigacion Avestrus, di cual cinco ya ta den libertad.
Riba exigencia di Ministerio Publico, hues-comisario a duna ordo pa detencion (bewaring) di e sospechoso Freddy P. Every. Pa loke ta e sospechoso Franklin F. Abath a duna ordo pa detencion (gevangenhouding). E detencion di e sospechoso Pieter T.A. Susebeek ta den e fase di bewaring.
Diaranson Corte Superior a rechasa e apelacion di e sospechoso Maria Leoncita Arends contra su detencion (gevangenhouding). Un peticion di e sospechoso aki pa suspende su detencion a wordo rechasa, loke kiermen cu pa awo e lo keda den detencion preventivo.
E CASO AVESTRUZ
Ministerio Publico a informa dia 2 di october 2019, dia cu a haci entrada hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
