Como Oficina di Turismo, bou di e capa di mehoracion y desaroyo di producto Aruba, nos ta enfoca riba e proyectonan di embeyecemento cu ta wordo uza pa atrae e turistanan den diferente area di Aruba. Bou di e capa di mercadeo tambe sigur proyectonan manera e trapi aki ta gara atencion virtual como un asina yama “instagrammable spot”. Un spot cu bo lo comparti via rednan social basicamente.
Tipo di e aspectonan asina por bira punto di atraccion pa bishita Aruba. Hecho ta cu Ee lo ta un punto di atraccion pa bishita San Nicolas, den e caso aki Seroe Colorado. Banda di locual ya ta ofrece, esaki por agrega mas balor na e experiencia di e bishitante.
For di e angulo di mercadeo, video y potretnan di e trapi lo wordo comparti riba rednan social, asina amplificando e promocion di Aruba. Asina esunnan cu ta bishita ta sigui ta un parti integral di yuda promove Aruba.
A.T.A. a aporta pa a haci di promenade y vecindario e “Art Capital” di Caribe y aki tambe por mira e impacto di promocion, incluyendo cantidad di hende cu ta comparti obranan di arte via e rednan social of di otro manera. Asina lo tin mas ehempel di spot cu ta atractivo pa comparti via rednan social. Por ehempel e toren na Palm Beach dilanti di RIU Hotel.
Cada proyecto cu A.T.A. ta inverti den dje tin su motibo y sigur tambe su storia y esaki no ta un excepcion pa e trapi na Rodger’s Beach. Algun luna atras despues di diferente combersacion entre socionan a dicidi cu e trapi renoba na Rodger’s Beach lo wordo embeyece a traves di e arte di mozaik. Pa e arte ta relevante cu e area aki, a dicidi di enfoca riba flora y fauna di e area. A scoge flora y fauna ya cu ta un bon oportunidad pa asina tambe por genera mas conscientisacion riba nos naturalesa y e cuido di esaki. Directie Natuur en Milieu y Fundacion Parke Nacional Aruba tawata tin un rol importante den identifica e flora y fauna cu ta forma parti di e parke marino na Seroe Colorado. Despues, basa riba nan sugerencia, artista internacional di Mozaik, Isidora Paz, a produci e diseño pa e trapi agregando asina fantasia y creatividad.
E colaboracion cu a tuma luga pa e ehecucion di e obra di arte aki sigur tabata hopi bunita ya cu a conta cu 24 diferente artista cu a yuda cu e creacion di e obra di arte riba e trapi aki. Adicionalmente di esunnan menciona caba, e proyecto aki a conta tambe cu apoyo y colaboracion di Ministerio di Turismo, Comision di Infrastructura, DIP, DOW, artista como tambe tur boluntario cu a colabora pa haci di e proyecto un realidad.
A.T.A. kier felicita y gradici cada un cu a contribui na e proyecto aki y ta spera cu tur hende lo disfruta di dje.
