Mirando cu Aruba Human Rights for All (mi persona Astrid Vries) tin un programa social educativo na Mega FM 88.1 di dialuna – diabierna 10 am te cu 11 am pa informa, educa y conscientisa riba tur tipo di problema social y cu mi ta para pa cero discriminacion y trato igual, mi a tuma nota riba red social con un persona cu ta scondi tras di un fake account bou di e nomber “Alike Geerman”, cu ta realmente un persona cu ta traha den Cocolishi, e oficina central di gobierno, a publica riba su cuenta di Facebook si no tin un muhe mas bunita cu por representa SIMAR cu no ta e Zwarte Piet aki, referiendo esaki na Josephine Albertus, presidente di Sindicato SIMAR, cu ta lucha incansablemente p’e veld di enseñansa riba e 12.6% y tambe tur derecho cu e veld tin derecho riba dje. Derecho Humano ta bisa cu pa ningun motibo nos mester discrimina ningun persona pa motibo di nan rasa, color, sexualidad, creencia, edad, condicion fisico, genero, color politico, nacionalidad. Pasobra tur e 9 puntonan aki ta biba den cada un persona individual.
Racismo ta destructivo pa un sociedad pasobra e ta siña hende pa haci huicio tocante otro riba a base di e forma con nan ta mustra of e suposicion cu nan por haci riba persona di diferente cultura. Racismo ta permiti hende hustifica tur tipo di humiliacion y horor pa bishita den hende di otro cultura, bisando cu e otro personanan ta inferior of di algun manera cu nan ta menos humano den algun manera.
Ta spera cu gobierno a tuma nota di e expresion aki y cu a tuma carta den e asunto pa di ningun manera permiti pa discriminacion di ningun tipo tuma luga riba nos isla, unda cu tur persona di rasa, color, sexualidad, creencia, edad, condicion fisico, genero, color politico, nacionalidad ta biba y tambe no lubida cu nos pilar economico cu ta turismo, unda cu tur rasa, color, sexualidad, creencia, edad, condicion fisico, genero, color politico, nacionalidad ta bin disfruta di nos dushi pais Aruba y cu nos tin cu sirbi tur cu amor y respet mescos cu nos mester haci tambe cu nos mes na otro di trata otro cu amor y respet sin discriminacion.
Loke cu derecho humano si ta bisa nos pa nos no keda sin mira ta maldad. Ken cu haci malo y ta kibra ley mester ta castiga. discriminacion no ta un acto cu bo por castiga cu prizon pero e ta un acto si cu bo ta kibra e ley humano y mester tuma carta den e asunto.
Tin 18 tipo di racismo den e mundo aki: Bo tin racismo biologico, racismo sexual, racismo cultural, racismo di color di cuero, racismo di inhabilidada, racismo pa diferencia di religion, racismo p’e clase social, racismo pa inclinacion sexual, racismo internalisa, racismo espacial, racismo institucional, racismo sutil, racismo den contrali, racismo colorismo, xenofobia, discriminacion door di edad, racismo di reconocemento/imboluntario y racismo aversivo. Tur ta haci daño y tur ta destructivo.
Desafortunadamente awendia nos ta cansa di mira den e media varios caso violento di racismo, prehuicio y stereotipo social riba diferente grupo, sea cu nan ta stranhero, gay, inhabilidad of cualkier otro condicion cu ta diferente for di un su mes.
Aruba Human Rights for All ta pidi pa pone un paro na discriminacion/racismo pasobra nos no kier pa nos muchanan lanta cu e mentalidad destructivo aki. Ban laga nos aplica loke cu Derecho Humano ta bisa nos “nos tur a nace” liber y igual” cu ta un derecho cu nos tur tin p’e simpel motibo cu nos tur ta ser humano.
Den e ley di Derecho Humano e idea ta pa tur persona mester tin derecho. Tur ser humano ta nace liber y igual den dignidad y derecho. Articulo un di e declaracion universal di derecho humano di Nacionnan Uni den actualidad, e principionan ta proteha como derecho huridico den e derecho nacional y internacional di e mesun manera. Ban laga nos respeta tur e 30 articulonan cu ta ancra den nos constitucion.
Danki pa lesa! Ban actua awo y para contra tur tipo di discriminacion/racismo.
