Asociacion Amigos de Colombia (ASOCOL) ta preparando pa lansa nan prome campaña pa 2021. Segun Moises Fernandez, miembro di directiva di e asociacion, e campaña aki ta enfoca riba mamanan cabes di famia, cu tin e responsabilidad di e muchanan mas chikito cu 3 aña.
Directiva di e asociacion a dicidi pa lansa un campaña, cu cooperacion di dos entidad. Ta trata aki di e Aruba Chinese Club y tambe di Union Caribe, cualnan ta e motor di e campaña aki.
ASOCOL ta gradicido cu e dos entidadnan aki pa a kere den e asociacion. ASOCOL ta enfoca riba e grupo di Colombiano cu ta biba riba Aruba y definitivamente e trabao social ta bay directamente enfoca riba e tipo di actividadnan aki.
Di parti di direciva di Aruba Chinese Club, Kevin Li, desde comienso di COVID, nan a yuda bek na e comunidad di Aruba. Durante e pandemia, e club a dicidi pa yuda tur instancia y personanan den necesidad. Semper nan ta dispuesto pa sigui yuda.
Di parti di Union Caribe, Marlandi Gracia, a expresa di ta un placer pa yuda e comunidad Colombiano y demas comunidad. E pandemia a dal hopi duro y segun Gracia, si Union Caribe por a sigui dilanti, por a apoya e comunidad Colombiano y otro personanan y sigui brinda nan servicio, ta pasobra Dios a yuda te asina leu, pa un maneho sabio di parti di gerencia. Di berdad a confia y sigui confia cu Dios tin tur cos den control. Union Caribe tey pa sigui yuda y sigui dilanti y cualkier cos cu tin mester, sa cu por conta cu Union Caribe.