Dialuna Universidad di Aruba a tene un anochi di lectura informativo ariba tur e cambionan den e sector di hospitalidad y turismo despues di COVID na Aruba. Asistencia na e anochi di informacion aki tabata halto y a conta cu diferente profesional den diferente ramo aki na Aruba.
E lectura tabata duna pa Robin B. Dipietro kende ta profesora y directora di e International Institute for Foodservice Research and Education na e departamento di hospitalidad y manehamento di turismo na universidad di South Carolina.
Topico principal di e anochi di informacion aki tabata e estudio haci ariba e expectativanan di empleadonan y huespednan despues di COVID. Durante e lectura e interesadonan a haya informacion concreto tocante e estado di desaroyo turistico actual na Aruba y tambe con esaki a cambia despues di COVID cu e meta pa refleha ariba kico lo haci diferente den caso cu un situacion similar presenta.
Resultadonan di estudio
For di e estudio, haci na final di 2020, por saca afo cu e empleadonan di e sector turistico na Aruba ta preocupa pa cu e situacion turistico di nos isla, specificamente nan situacion financiero, economico y nan siguridad laboral. Esaki ta remarcabel, mirando cu empleadonan cu no ta labora den e sector aki, aunke cu e situacion actual ainda no ta loke cu e tabata prome cu COVID, no necesariamente tin e mesun preocupacionnan specifico aki.
E expectativanan di e empleadonan pa cu nan dunado di trabou ta halto. Segun e profesora, e empleadonan ta spera di nan dunado di trabou un cultura laboral positivo, nan ta spera cu e dunado di trabou ta provee tecnologia, bon comunicacion y suficiente espacio pa e empleado por duna su input pa cu e decisionnan tuma.
