Minister Plenipotenciario Suplente, mr. Ady Thijsen, a ricibi na Arubahuis e duaneronan cu e aña aki un biaha mas a participa na e di 104 edicion di e 4-daagse di Nijmegen; esaki despues di dos aña cu e 4-daagse no por a tuma luga pa motibo di Covid 19.
E duaneronan cu a participa tabata Marlon Ruiz, Giovanni Davelaar y Oliver Wever. Jerrold Tromp cu tambe ta forma parti di e grupo no por tabata presente. E aña aki debi na temperatura hopi halto na Hulanda, e organisacion di 4-daagse a dicidi pa reduci e evento na tres dia di canamento. Thijsen a felicita e duaneronan cu e gran logro aki. Tambe e mandatario a gradici e cuater Arubianonan pa nan promocion grandi pa nan isla natal durante di e cuater dianan di e 4-daagse.
Diabierna siman pasa e duaneronan a ricibi nan medaya durante un ceremonia na Fletcher Hotel na Berg en Dal. Marlon Ruiz a haya su medaya pa a participa e aña aki pa di 16 biaha y na Giovanni Davelaar cu e aña aki cana den e Vierdaagse pa di 14 biaha. Oliver Wever a haya un medaya pa su participacion pa di 6 biaha. Finalmente Jerrold Tromp cu a participa e aña aki pa di 4 biaha.
Banda di e grupo duaneronan cu a participa na e 4-daagse di Nijmegen, Arubahuis tambe kier a felicita tur e Arubianonan sea individual of den grupo cu a cana e 4-daagse di Nijmegen 2022.
