E campeonato di Arubaanse Voetbal Bond (AVB) ta reanuda. Despues di a reuni cu tanto e clubnan como e refereenan, a yega na un palabracion cu lo continua cu e campeonato.
Tanto AVB, e clubnan como e refereenan ta desea lo miho pa futbol. Tin ainda diferente punto cu mester ta resolvi, pa cual motibo lo forma un werkgroep entre e representantenan di AVB, e referee- y clubnan pa discuti e puntonan aki y asina partido yega mas cerca na otro, locual ta na bienestar di futbol.
Na e momento aki nos ta pidi pa tene cuenta cu enfoke ta riba nos seleccion nacional cu mañan, esta diasabra 14 di october, tin un compromiso historico. AVB lo informa mas pronto cu ta posibel riba e campeonato.
