Den fin di siman Aruba Taekwondo Bond (ARTBO) a organisa un seminario pa 1ste Dan te cu 4de Dan na Estrella Taekwondo Center. Estrella Taekwondo Center bou encargo di Nuno Tromp ta train taekwondo ariba diamars y diahuebs for di 6:00 pm te cu 8:00 pm.
Master Melvin Rasmijn hunto cu Master Miguel Genser a dirigi e seminario. Master Melvin Rasmijn a splica y mustra den detaye con e formanan di Taekwondo mester wordo haci. Pa examen di faha preto, un Dan te cu cinco Dan bo mester sa e forma nan pa ora di haci examen. ARTBO kier pa tur scol local ta ariba e mesun nivel cu esun cu ta stipula pa ARTBO. Tur atleta cu kier haci examen pa faha preto, mester haci examen na ARTBO. ARTBO tin su comision di examen cu ta consisti di tres persona cu ta wak cu wowo hopi critico.
Master Joshmar Wever, Jason Ridderstap y varios atleta di Estrella Taekwondo Center y Noord Taekwondo Center a asisti na e seminario cu a cuminsa for di 10:00 am y a termina pa 5:00 pm. E seminario tabata duna den dos siman mirando presidente di ARTBO, Moises Fernandez, a gradici tur atleta cu a participa na e seminario. ARTBO ta bay tin un otro seminario na luna di november. Master Melvin Rasmijn lo bay mas profundo den e tecnicanan. ARTBO ta enfoca hopi pa mira cua di e atletanan lo sigui den forma pa Aruba por tin un representante den forma.
Pa un atleta sigui e rumbo di Poomsea, e atleta mester train hopi mas duro. Master Melvin Rasmijn ta prepara e atleta pa ta na e nivel pa representa Aruba. Taekwondo no ta solamente bringa. Tin algun atleta elite cu ta representa Aruba mundialmente, manera Elliott Loonstra cu ta number dos na mundo den su categoria.
